Communion/Nyanc Singx Hnaangx In Remembrance of Christ/Weic Jangx

Taux Yesu

1 Ko^lin^to 11:23-33 Zeuz, YauzSing

1 Ko^lin^to 11:23-33 Hnangv Haaix Nor Nyanc Ziouv Yesu Liepc Daaih Wuov Donx

Hnaangx 23 Weic zuqc Ziouv jiu bun yie nyei leiz yie zipv daaih yaac jiu

bun meih mbuo mi'aqv. Se dongh Ziouv Yesu zuqc maaic wuov muonz, ninh zorqv njuov daaih, 24 laengz zingh liuz Tin-Hungh, ninh ziouc maeqv nqoi daaih gorngv, “Naaiv yie nyei sin, se weic meih mbuo. Meih mbuo oix zuqc hnangv naaiv zoux weic jangx yie.” 25 Nyanc liuz hnaangx, Yesu fih hnangv nyei zorqv norm zaanv daaih yaac gorngv, “Naaiv norm zaanv se longc yie nyei nziaamv liepc jiez nyei siang-ngaengc waac. Meih mbuo haaix zanc hopv naaiv norm zaanv, oix zuqc hopv weic jangx yie.” 26 Meih mbuo haaix zanc nyanc naaiv norm njuov, hopv naaiv norm zaanv, meih mbuo bun cing Ziouv daic mi'aqv. Hnangv naaiv zoux taux ninh aengx daaih.

Maiv Dungx La'guaih Nyanc Ziouv Yesu Liepc Daaih Nyei Hnaangx

27 Weic naaiv, haaix dauh la'guaih nyanc Ziouv nyei njuov, longc Ziouv nyei zaanv hopv, wuov dauh ziouc baamz Ziouv nyei sin caux Ziouv nyei nziaamv. 28 Dauh dauh mienh oix zuqc zaah ganh nyei hnyouv ndaangc cingx daaih nyanc naaiv norm njuov, hopv naaiv norm zaanv. 29 Haaix dauh nyanc fai hopv yaac zieqv maiv duqv Ziouv nyei sin, ninh nyanc yaac hopv bun ninh ganh zuqc dingc zuiz. 30 Weic naaiv meih mbuo mienh camv butv baengc, mau haic, aengx maaih deix daic mi'aqv. 31 Se gorngv mbuo zaah ganh nyei hnyouv ndaangc ziouc maiv zuqc Tin-Hungh dingc zuiz. 32 Mv baac Ziouv siemv mbuo nyei zuiz, mbuo zuqc mborqv njaaux weic bun mbuo maiv zuqc caux lungh ndiev dingc zuiz. 33 Gorx-youz aac, weic naaiv meih mbuo gapv zunv nyanc Ziouv liepc daaih nyei hnaangx, laanh oix zuqc zuov laanh. 34 Haaix dauh hnyouv sie, oix zuqc yiem biauv nyanc ndaangc. Taux gapv zunv nyei ziangh hoc, meih mbuo ziouc maiv zuqc dingc zuiz. Wuov deix ganh nyungc sic, zuov yie taux m'daaih mbenc.

Gorngv Jiex Gorn Nyei Waac Yesu zorqv norm juov caux norm zanv, yiem ninh

mbuo fingx dongh benx pou-tong nyei nyanc hopv daaih njaaux taux sienx ninh nyei mienh…hnangv haaix nor caux ninh jiu-tong. Juov caux zanv ganh maiv maaih haaix nyungc eix-leiz fai jaa-zinh, maaih eix-leiz fai za’zinh se weic zuqc nyanc nyei mienh nyei hnyouv zieqv duqv TH nyei en zingh yaac laengz zingh ninh, jangx taux Yesu zuqv diev kouv weic mbuo. Mbuo buatc Ko^lin^to jiu-baang la’guaih nyanc, maiv hiuv taux zien eix-leiz fai maiv zieqv duqv Tin-Hungh. Ih hnoi mbuo daaih juangc jienv nyanc singx-hnaangx.

Naaiv se benx qiangx bun mbuo mangc nzuonx, jangx taux Yesu zoux nyei gong yiem ziepc nzangc jaax weic mbuo yaac laengz zingh ninh, bun qiangx mbuo mangc mingh wuov ndangc, jorm hnyouv caux maaih noic nyei zuov jienv ninh aengx daaih dorh mbuo nyei hnoi. Bun qiangx mbuo mangc ga’nyuoz, zaah ganh nyei hnyouv, nyiemz ganh nyei zuiz, guangc ganh zoux nyei zuiz. Bun qiangx mbuo mangc ga’nyiec ga’hlen, haaih laanh tengx laanh yietc zei gauh haih ziangh weic Ziouv, haih juangc jienv benx yietc norm sin bun Giduc zoux mbuo nyei m’nqorngv zoux Ziouv.

A. Mbuo oix zuqc Mangc Nzuonx (v. 23-26a) 1. Maeqv nqoi nyei juov bun mbuo jangx Taux Yesu

Giduc nyei sin zuqc diev weic mbuo. Zaanv bun mbuo jangx taux ninh nyei nziaamv liouc cuotv weic mbuo. Hipv^lu 9:22 “Maiv maaih nziaamv liouc cuotv nor, Tin-Hungh yaac maiv haih guangc mienh nyei zuiz”

2. Yesu oix mbuo jangx jienv ninh zuqc daic yaac naangh daaih. se benx mbuo sienx Yesu mienh nyei gorn ndoqc. Hnangv Baulo gorngv yiem 1 Ko^lin^to 15:14 “Se gorngv Tin-Hungh maiv zeiz bun Giduc nangh, yie mbuo zunh nyei kuv fienx maiv maaih gorn. Meih mbuo sienx nyei yaac maiv lamh longc”. Kuv fienx is Giduc daic aengx nangh daaih (1 Ko^lin^to 15:3-4 “Yie ganh zipv daaih nyei yie zunh mbuox meih mbuo mi'aqv. Gauh longc jienv jiex nyei se hnangv Ging-Sou fiev jienv gorngv nor, Giduc weic mbuo nyei zuiz daic. Yaac hnangv Ging-Sou gorngv, ninh zuqc biopv jienv. Taux da'faam hnoi Tin-Hungh aengx bun ninh nangh daaih )

3. Yesu yaac oix mbuo jangx jienv weic haaix nyungc ninh zuqc daic: Se weic mbuo nyei zuiz. “Giduc ganh longc ninh nyei sin ndaam jienv mbuo nyei zuiz yiem ziepc nzaangc jaax, bun mbuo biaux ndutv zuiz nyei qaqv yaac ziangh jienv weic zoux horpc hnangv. Weic zuqc Yesu siouc mun, meih mbuo duqv ninh zorc meih mbuo longx nzengc. (I^saa^yaa. 53:6; 1 Bide 2:24).

4. Mbuo oix zuqc jangx jienv ninh hnangv haaix nor daic, ding yiem ziepc nzangc jaax daic, Mbuo maiv dan jangx taux cuotv daaih nyei sic, mv baac jangx taux weic ninh hnangv naaiv nor zoux mbuo cingx duqv njoux, duqv maaih jauv mingh Tin-dorngh, duqv ziangh maengc weic mbuo sienx ninh zoux div mbuo. Mangc nzuonx ziouc bun mbuo maiv la’kuqv, bun mbuo zieqv duqv en zingh…

B. Mbuo oix zuqc Mangc mingh wuov ndangc (v. 26b)

1. Mbuo haaix zanc nyanc naaiv norm njuov, hopv naaiv norm zaanv, meih mbuo bun cing Ziouv daic mi'aqv. Hnangv naaiv zoux taux ninh aengx daaih” (1 Ko^lin^to 11:26)

2. Yesu maiv dan daic yiem ziepc nzangc jaax hnangv mv baac ninh nangh daaih, liuz aengx nzuonx Tin-dorngh mi’aqv, Yesu gorngv mbuox sai-gorx mbuo, “Yie yaac mingh liuc leiz dorngx bun meih mbuo yiem. Yie mingh liuc leiz ziangx dorngx bun meih mbuo yiem, yie aengx daaih dorh meih mbuo mingh caux yie yiem wuov. Yie yiem haaix meih mbuo ziouc caux yie yiem wuov (Yo^han 14:2-3)

3. Yesu aengx nzuonx daaih dorh mbuo nyei hnoi se benx maaih lamh hnamv nyei hnoi. (Tidatc 2:13-14) “Oix zuqc hnangv naaiv nor zoux zuov jienv mbuo maaih lamh hnamv oix duqv nyei orn-lorqc, dongh hlo jiex nyei Tin-Hungh, mbuo nyei Njoux Ziouv Yesu Giduc, yiem ninh nyei njang-laangc aengx daaih. Ninh weic mbuo siev ninh ganh nyei maengc zuoqc mbuo nzuonx, leih ndutv yietc zungv waaic nyei, orqv nyei sic. Ninh yaac nzaaux mbuo cing-nzengc daaih, benx ninh ganh nyei mienh, mbuo ziouc jorm hnyouv nyei zoux nyungc-nyungc kuv sic”

4. Mbuo oix zuqc mangc mingh wuov ndangc dongh Yesu Giduc aengx daaih nyei hnoi, “mbuo hiuv duqv Giduc hinc cuotv wuov zanc mbuo oix hnangv ninh nor, weic zuqc Yesu za'gengh hnangv haaix nor, mbuo yaac duqv buatc ninh hnangv wuov nor (1 Yo^han 3:2) Naaiv nyungc maaih lamh hnamv bun mbuo haih ziangh yiem seix zangc, ziangh weic hoc nqaang nyei! Yaac ging jienv hnyouv zuov jienv Ziouv aengx daaih nyei hnoi.

C. Mbuo oix zuqc mangc ga’nyuoz fai ganh nyei hnyouv. (v.27-28; 31-32)

1. Baulo gorngv heuc mbuo oix zuqc “nyanc puix duqv” fai maiv dungx la’guaih nyanc. Maiv zeiz gorngv mbuo “oix zuqc puix duqv nyanc.” (v.27) Maiv maaih haaix laanh puix duqv nyanc…laanh laanh haih nyanc puix duqv.

2. Nyanc puix duqv se gorngv mbuo zaah ganh nyei hnyouv ndangc (v.28) Nyiemz ganh nyei zuiz (v.31), Guangh zoux nyei zuiz. . Se gorngv mbuo maiv nyiemz mbuo nyei zuiz, maiv horpc zuqc nyanc. Mbuo nyanc weic mbuo longc qiangx zaah ganh, nyiemc zuiz, caux Yesu maaih jiu-tong. Kungx sienx Yesu nyei mienh dongh ei jienv ninh nyei waac ziemx wuom nyei leiz weic biux mengh muangx ninh nyei waac nyei mienh yiem jiu-bang horpc zuqc nyanc hnangv.

3. Nyanc singx-hnaangx mv baac maiv zaah ganh nyei hnyouv caux nyiemz ganh nyei zuiz ziouc baamz Ziouv nyei sin caux Ziouv nyei nziaamv (v.27, 29) weic zuqc Yesu Giduc weic mbuo nyei zuiz ninh zuqc ding daic yiem ziepc nzangc jaax.

4. Tin-Hungh oix dingc fai mborqv njaaux mbuo taux mbuo goiv hnyouv guangc zuiz se gorngv mbuo ganh maiv oix goiv. (dingc zuiz) wuov joux waac bun taux Sienx Yesu nyei mienh se maiv zeiz gorngv oix dingc hnangv zuqc ndortv deic nyuoqc, mv hnangv hnamv mbuo nyei dae mborqv njaaux ninh nyei dorn oix bun ninh nyei dorn muangx waac. (Hipv^lu 12:1-11), Ninh hnamv nyei mienh ninh mborqv njaaux. (1 Ko^lin^to 11:32 Mv baac Ziouv siemv mbuo nyei zuiz, mbuo zuqc mborqv njaaux weic bun mbuo maiv zuqc caux lungh ndiev dingc zuiz).

D. Mbuo oix zuqc mangc ga’nyiec, junh, gormx, ga’hlen (v.33-34)

1. Mbuo oix zuqc mangc junh, gormx, caux, ga’hlen weic tengx gorx youz haih zieqv duqv Ziouv (v.29). Weic mbuo benx yietc norm sin. Hnangv 1 Ko^lin^to 10:17 “Weic zuqc maaih nduqc norm njuov hnangv cingx daaih maiv gunv maaih mienh camv, mbuo benx yietc norm sin, weic zuqc mbuo juangc wuov norm njuov nyanc.”

2. Mbuo maiv zeiz mangc junh, gormx, ga’hlen weic oix daanh mienh, fai siemv mienh. Weic zuqc mbuo laanh laanh ganh oix zuqc zaah ganh nyei hnyouv maiv zeiz mienh nyei hnyouv.

3. Mbuo mangc junh, gormx, fai ga’hlen weic mbuo benx jiu-baang nyei hmuangv doic, TH nyei hmuangv doic. Tin-Hungh oix ninh nyei hmuangv doic lanh goux lanh, lanh mangc lanh, lanh ceix lanh, lanh orn lanh…

4. Zien Sienx Giduc mienh dongh zaah liuz ganh nyei hnyouv oix zuqc nyanc puix duqv Ziouv liepc wuov donx singx hnaangx. Mangc junh, mangc gormx mangc ga’hlen se gorngv mbuo oix zuqc tengx mbuo nyei gorx youz bun ninh mbuo haaih nyanc puix, mbuo haih tengx weic Ganh nyei m'zing maaih nqanx ndiangx, meih fungc haih mbuox meih nyei gorx-youz, ‘Gorx aac, yie tengx gorx ban cuotv m'zing nyei la'fapv oc (Matv^tai 7:4).

Dorh Ging-sou Nyei eix-leiz daaih longc yiem maengc:

1. Nyanc Singx Hnaangx weic jiu-tong caux Tin-Hungh a).Mbuo biux mengh mbuo muangx Ziouv nyei waac dongh

mbuo nyanc Singx Hnaangx (Matv^tai 26:26-27 Yesu zorqv njuov daaih, laengz zingh liuz Tin-Hungh, ziouc maeqv nqoi bun ninh nyei sai-gorx mbuo, yaac gorngv, “Zipv daaih nyanc aqv. Naaiv se yie nyei sin.”Yesu aengx zorqv zaanv a'ngunc diuv daaih, laengz zingh liuz Tin-Hungh, ziouc bun ninh mbuo, yaac gorngv, “Meih mbuo yietc zungv gunv hopv maah) Yesu heuc ninh nyei sai-gorx mbuo zipv fai zorqv daaih nyanc fai…gunv hopv maah, fai hnangv naaiv zoux…naaiv se benx hatc nyei waac fai heuc mbuo zoux nyei waac.

b). Nyanc Singx Hnaangx weic duqv caux Ziouv maaih jiu-tong, mbuo juangc jienv nyanc weic mbuo juangc jienv caux Ziouv jiu tong. Hnangv mbuo caux mienh juangc nyanc mbuo juangc jienv jiu tong nor (Gong-zoh 2:41-42 Mienh camv nyei sienx Bide nyei waac ziouc jiex wuom nyei leiz. Dongh wuov hnoi maaih leih maiv go buo cin dauh mienh tim bieqc gong-zoh mbuo nyei guanh. 42 Ninh mbuo longc hnyouv muangx gong-zoh mbuo njaaux leiz yaac lomh nzoih jiu tong, juangc jienv maeqv njuov ; 1 Ko^lin^to 10:21 Meih mbuo hopv Ziouv nyei zaanv, maiv haih hopv mienv nyei zaanv. Meih mbuo juangc Ziouv nyei dieh nyanc, maiv haih juangc mienv nyei dieh)

c). Yesu ganh gorngv mengh nyei, “Yie gorngv zien mbuox meih mbuo, se gorngv meih mbuo maiv nyanc Baamh Mienh nyei Dorn nyei orv, yaac maiv hopv ninh nyei nziaamv, yiem meih mbuo gu'nyuoz maiv maaih ziangh maengc aqv. 54 Haaix dauh nyanc yie nyei orv, hopv yie nyei nziaamv, wuov dauh maaih yietc liuz nyei maengc. Nqa'haav laai wuov hnoi yie yaac oix bun ninh nangh daaih. 55 Weic zuqc yie nyei orv caux yie nyei nziaamv se zien nyanc hopv. 56 Haaix dauh nyanc yie nyei orv yaac hopv yie nyei nziaamv, wuov dauh caux yie juangc maengc ziangh. Yie yaac caux wuov dauh juangc maengc ziangh“ (Yo^han 6:53-58) Mbuo duqv yietc liuz nyei maengc weic mbuo sienx Yesu fai caux ninh maaih jiu-tong. Mbuo nyanc singx hnaangx biux mengh gorngv mbuo sienx Yesu daic, ninh nyei nziamv maiz mbuo nzuonx daaih (Mouz laanh mienh ganh oix zuqc sienx)

d). Mbuo horpc zuqc a’heiv zipv nyanc weic mbuo duqv Tin-Hungh guangc mbuo nyei zuiz, yaac duqv yietc liuz nyei maengc. Maiv zeiz gorngv gamh nziex maiv nyanc. Sienx Tin-Hungh mienh oix maaih buonc jiu tong oix zuqc nyanc…maiv zeiz gorngv yie maiv nyanc nor zoux zuiz yaac maiv zuqc nyiemc fai maiv zuqc dingc. Daux nzuonx mbuo duqv qiangx nyiemc zuiz, duqv caux Ziouv jiu-tong, duqv buonc juangc maengc ziangh. (1 Ko^lin^to 10:16 Mbuo weic wuov norm laengz zingh nyei zaanv laengz zingh Tin-Hungh liuz ziouc hopv, mbuo maaih buonc juangc Giduc nyei nziaamv maiv zeiz? Maeqv nqoi njuov nyanc wuov zanc, mbuo maaih buonc juangc Giduc nyei sin maiv zeiz?)

1. Nyanc Singx Hnaang se sienx Yesu mbuo zoux weic biux mengh benx fangx gorngv, mbuo jangx taux mbuo nyei Ziouv daic weic mbuo nyei zuiz, mbuo yaac zorqv qiangx daaih nyiemc zuiz, zorqc qiangx daaih caux Ziouv jiu-tong. Nyanc Singx Hnaangx se ziangh hoc bun mbuo mangc nzuonx…jangx taux Yesu zuqc daic div mbuo nyei zuiz, ninh daic yiem ziepc nzangc jaax, ninh nyei sin zuqc mun weic mbuo, ninh nyei nziaamv liouc cuotv bun mbuo duqv TH guangc zuiz.

2. Nyanc Singx Hnaangx se ziangh hoc bun mbuo mangc mingh wuov ndangc, ziangh hoc bun mbuo maaih lamh hnamv weic Yesu laengz jienv aengx daaih dorh mbuo mingh caux ninh yiem wuov Tin-dorngh.

3. Nyanc Singx Hnaangx se ziangh hoc bun mbuo mangc ga’nyouz ganh nyei hnyouv, zaah ganh nyei hnyouv, nyiemz ganh nyei zuiz, guangc maiv zoux jienv zuiz mingh..

4. Nyanc Singx Hnaangx se ziangh hoc bun mbuo mangc junh, gormx, ga’hlen, ga’nyiec, weic tengx gorx youz juangc jienv nyanc puix Ziouv liepc wuov donx singx hnaangx. Weic mbuo benx yietc norm sin, Giduc zoux m’nqorngv. “Jiu-baang zoux Giduc nyei sin, Giduc yaac zoux jiu-baang nyei “M’nqorngv”Njoux Ziouv. (E^fe^so 5:23) Sienx Yesu nyei mienh sienx liuz Yesu ziouc ziemx wuom fai jiex wuom nyei leiz, ziemx wuom nyei leiz se benx dauh kang biux mengh gorngv mbuo muangx Ziouv nyei waac.