940
|| śrīḥ || śrīlakṣmaṇadeśikendraviracitaṃ śāradātilakam śrīmadrāghavabhaṭṭakṛta " padārthādarśa " ṭīkāsahitam atha prathamaḥ paṭalaḥ nityānandavapurnirantaragalatpañcāśadarṇaiḥ kramād vyāptaṃ yena carācarātmakamidaṃ śabdārtharūpaṃ jagat | śabdabrahma yadūcire sukṛtinaścaitanyamantargataṃ tadvo'vyādaniśaṃ śaśāṅkasadanaṃ vācāmadhīśaṃ mahaḥ || 1 || " padārthādarśaḥ " śrīkaṇṭhaṃ nijatāṇḍavapravaṇatāproddāmamododayaṃ paśyantyāḥ kutukādbhutapriyatayā sañjātabhāvaṃ muhuḥ | mandāndolitadugdhasindhulaharī līlālasaṃ locana- prāntālokanamātanotu bhavatāṃ bhūtiṃ bhavānyāḥ śubham || 1 || saṃsevyamānamṛṣibhiḥ sanakādimukhyai- ryegena gamyamavinaśvaramādibhūtam | saṃsārahṛnnigamasāravicārasāraṃ śaivaṃ maho manasi me mudamādadhātu || 2 || bhadrāya bhavatāṃ bhūyād bhāratī bhaktibhāvitā | smṛtirujjṛmbhate yasyā vāgvilāso'tidurlabhaḥ || 3 || śāradātilake tantre gurūṇāmupadeśataḥ | padārthādarśaṭīkeyaṃ rāghaveṇa viracyate || 4 || sampradāyāgataṃ kiñcid gaṇitāgamasammatam | yaduktamatra tat santo vicārayitumarhatha || 5 || piśuno dūṣakaścet syānna taddoṣāya dūṣaṇam | doṣāvahā hi vikṛtirna svabhāvo hi dustyajaḥ || 6 || atheśvaraḥ sarvā api śrutīrbhavapāśabaddhānāṃ jantūnāṃ svargāya muktaye ca samupadiśati sma | anyeṣāṃ tu smṛtiśāstrādīnāṃ tanmūlakattvena tadarthapratipādakattvena ca prāmāṇyamiti suprasiddhataram | asyāstvāgamasmṛteḥ kathaṃ tanmūlakattvam | anyacca taireva viśeṣeṇa paryālocitaiḥ svarge'thavā muktirapi bhaviṣyatīti kimanayeti prāpte brūmaḥ | " sa ekṣata bahu syāṃ prajāyeya " iti |
