Date post: | 24-Jan-2023 |
Category: |
Documents |
Upload: | independent |
View: | 0 times |
Download: | 0 times |
UKALE RẸ OBENU OREGHEREGHE(Sojourning in Space, a short story in Urhobo)
Osia Rẹ
Akpobọmẹ Diffrẹ-Odiete
Gberi
Ẹdẹ Erha rẹ Ane, 2013
Ọ dia osio rhọre vwẹ ẹdẹ rẹ ihwe rẹ emeravwe rẹ
Ururuvwe naa, yẹ oma rẹ Umukoro Kpọrhọre no ada
rhe. Akpọ basaa, ọmọ rọye rọ rhe ọride chedia
agbara rode rọhẹ utuwevwi ọke rẹ ọsẹ rọye vwọ ruọ
uwevwi na.
“Papa, wẹ rhe/re?” Akpọbasaa de vrẹn brora.
“Me rhe re”, Umukoro de no tee nu te otọ. “wọ gba
rhe ra reyọ igho re”. Isukuru nana re rhieri vwẹ
odẹ rẹ Ukukoro Mohwo na kẹ ọ rẹ igho ẹguọnọ?”
“Ọ dia igho me rhe rehọọ, papa”. Akpọbasaa de
mu ekpu rọye mien. “Ọna oride rẹ Ikrisi masi”.
“Papa, die ru we oma wẹ vwọ kpọrhọ? Osio rhọre
obo wẹ ra re na?”.
“Ọna ọdja rẹ iroro rẹ obo Urhobo sa vwọ yan
obaro.” O ku ewun na no oma. “Mie wẹ vwọ ya isio
na”…
Akpọbasaa reyọ ewun rẹ oma na mie vwọ ya isio o
de chekọ egbru na rẹ o vwo rhuon na. Umukoro
chedia agbara rode na, o de se aye rọye, “otiti o!”
“Ọshare mẹ”, aye rọye nyori, ọ da yan no ukpe
ro utuwevwi.
“Ru emu kẹvwẹ me re”
“Mi nyori, ọse Basa”. Oma vwerhọ Akpọbasaa siẹ
rẹ ihwo de bro odẹ rọye na krẹẹ. Ọke buebu ọ vuẹ
aye nẹ ọyen dia ohwo rẹ Ikala-baa, nẹ e rhe se ọyen
Basaa, Kidie ọ họhọ Bassey, odẹ rẹ Ikalaba.
Umukoro vwọ re emu nu, o de gbe iku rẹ obo re
phiare vwẹ osikoko rẹ Urhobo Progress Union (UPU)
rẹ ukpe yena. A nẹ ihwo ejobi rhọvwephiyo eravwọ
buebu, marho raye kẹ ivẹ.
Ọrẹ ẹsosuọ, a nẹ o fori a vwọ kparọ odẹ rẹ
Urhobo kpenu ruọ edia rẹ oseghe-usuon vwẹ ẹkuoma rẹ
orukugbe rẹ Urhobo vẹ ukoko rẹ Arewa vẹ ihwo efa
vwẹ inajiria.
Ọrẹ ivẹ, a nẹ o fori Urhobo vwo jo ihwo kpo
ukale vwe obenu oreghereghe na. ena cha dia ihwo
rẹ Urhobo.
“Papa”, Akpọbasaa de se ọsẹ rọye.
“Ihwo Urhobo riẹn ona vẹ erianriẹn rẹ e vwo kpo
obenu oreghereghe?”
“E che yono,” ọsẹ rọye da vwọ obọ pẹpẹ ugbuko
rẹ Akpọbasa. “Ọdia obo rẹ a gua okọrenu wo ji yono
vwẹ Ukukoro Mohwo Yunivasiti rẹ Evwreni na?”
“Ẹhẹn. Ọdia nanana ọyen Urhobo che jo ihwo raa.
E che muegbe mamọ kpahọ, kidie ọna dia owian rẹ
rhuẹrẹ oma raye phiyọ, eyen e che ji ra. Ọtiọye
na, ọmọ mẹ gbe se ẹbe wẹn gan sienẹ wọ sa dia usun
rẹ ihwo na.
“Akpọbasaa gbe uyovwi phiyọ otọ rẹ ọ vwọ kerhọn
rẹ ota ọsẹ rọye tan a. O roro fioma jovwoo,
ẹkẹvuọvo, ọsọ rọye dje iroro kẹ nure. “Mi nyori,
ọsẹ mẹ”. Orua rode rẹ Akpọdiruẹ vwẹ Mọsoga oyen
Umukoro nurhe. Ihwo rẹ orua nana nabo vwẹ ẹwẹn
rayen ejobi ru emu.
Urhughwrẹ vwọ gbare, Akpọbasaa da nabọ mrẹ ota
rẹ UPU rẹ ọsẹ rọye vuẹrẹ. O de mu ota na phiyọ
avwre rẹ akpo eje rẹ e se nẹ ọbe0opharo (Oyibo se
nẹ Facebook). Igbeyan rọye ejobi vwẹ ọbe-opharo de
nyo kpahọ nẹ UPU guọnọ ihwo rẹ Urhobo rẹ riẹn ona
rẹ ọwena sansa, igbu rẹ ẹebe eyono, efuẹrẹ
erianriẹn kugbe ihwo sansan re sa wian kpahẹ obo rẹ
Urhobo se vwo ji ihwo kpo obenu oreghereghe. UPU
ta phiyọ ọbe-iyẹrẹ na nẹ te eberokpa, te ivie, te
UPU asan akpọ na fa ba te ihwo rẹ Urhobo soso
rhọnvwe re nẹ ayen cha je arhọghọ rẹ owian na.
Ihwo buebu vwo nyo kpahẹ iyẹrẹ na ayen da ghwiẹ
kpo asa rẹ UPU rhuẹrẹphiyọ rẹ e se Uwevwi rẹ
Koyagbodi re a da Fuẹrẹ. Ẹbe vẹ Erianriẹn, vwẹ
Ughọtọn rẹ Okpe. E se vwẹ oyibo nẹ Koyagbodi.
Research Center. E mu odẹ na kẹ ọtiọye rẹ dia ọbo-
ẹbeyono (PhD) vwẹ ẹbe ẹfuẹrẹ vẹ ẹgnọnọ rẹ aghwanre.
Ukoko rẹ Urhobo rohẹ inọko re se Urhobo Historical
Society (UHS) ji ihwo rhe. Ihwo ji no Urhobo
Studies Association vwẹ Delta State University,
Oruarivie-Abraka rhe. Ewena sansan, ihwo re gua
okọrenu jovwore, isodje ri ku owian ranye phiyọ rẹ,
emọrisukuru, isodje rẹ ame vẹ e rẹ enu kugbe idjene
rẹ e fan orhan jovwo ri kurhẹriẹ re e vọn etiyin.
Akpọ basaa vẹ ugboyan rọye ọmọte, Ọmọtughele je
rhe. Evun rẹ ihwo nana kọye a da sanọ buebu raye
rẹ ayen vwọ wan owian rẹ ẹbẹ vẹ erianriẹn ẹfuẹrẹ
kpahe obo rẹ Urhobo se jo ihwo kpẹ obenu oreghere-
ghe na.
Ọke yena UPU de ghwoghwo nẹ owian rẹ iroro ẹjẹ,
egbe emuo, ihwo eyono, igho egbon kugbe okọrenu
ẹbọn na cha rehọ ẹgbukpe ẹrẹren tavwe Urhobo ki se
ji ihwo kpo obenu oreghereghe na. Igho rẹ e bruru
a cha vwọ wian owian na ejobi de dia inaira oduduma
ujuorin irhirin, Oduduru erha gbẹ ujuvẹ, odu
irhirin gbẹ ujorha (900,340,960,000). Rẹ a sa vwọ
mrẹ igho na, e ghwoghwori nẹ ihwo rẹ Urhobo rhoma
mu owian rẹ okpa ẹbẹrẹ phiyọ no orere kpo orere.
Eghọn rẹ UPU ke cha dia vwẹ kẹ uvie kẹ uvie rẹ
Urhobo sienẹ etiyin kọye ihwo rẹ Urhobo se torho
igho ra. Osun rẹ UPU ejobi kpo isi ra guọnọ igho
mie eghọn rẹ UPU rehẹ Ghana, Amẹrika, Ibriteni,
Iyuropu sos vẹ akpọna ejobi.
Ikoko rẹ ewena sansan vwọba iroro ẹjẹ vẹ owian
na. Ukoko rẹ Uloho rẹ Iwevwi Ẹbọn vwẹ Ughele ọyen
mu owian rẹ iwevwi ebọn rẹ a cha dia de bọn okọrenu
vẹ ekuakua sansan rẹ a cha vwọ wian owian na.
Ukoko Ewena rẹ susu (UES) rẹ e vwo mu ọghọ kẹ
Akpọveta susu rẹ Olomu ọyen rehọ owian rẹ okọrenu
na ẹbọn vẹ ekuakua rẹ a cha vwọ bọn sansan. Evun rẹ
Agbarho ọyen e rhie Uwevwi Ẹgbẹn rẹ Okugbe Urhobo a
da Fuẹrẹ obenu-oreghereghe (OUFO) phiyọ. Etinẹ
ọyen idjene vẹ egba-erianriẹn te ewena cha dia di
sun okọrenu na siẹrẹ ọ da rhan kpo obenu re. Ayen
vẹ ihwo rẹ okọrenu na cha wẹnẹ ota kẹ ohwohwo bẹsiẹ
ayen vwo rhinvwi rhe akpọ obonẹ. Evun rẹ Agbarha
ọyen e de mu owian rẹ Agbada ebọn phiyọ. Agbada
nana Oyibo se ‘Launch Pad’ ọyen okọrenu n ache
mudia rẹ a cha de sa kpo obenu-oreghereghe. Emu
Bakery rẹ oruirhi Brume rẹ Udu vwoma kpahọ otọ tanẹ
ayen ke chere oghwo-evwri, amiedi, irhibo-otọ, ayen
miji gbe usi vẹ igari te ikara rẹ ihwo na cha ghwa
kpo oyan rẹ obenu-oreghere-ghe na. ayen tarọ nẹ
ayen se chere emu na idjerhe rẹ I di jẹ ẹkiọn a da
tobọ yanja ayen vwo ẹdẹ ighwrẹn.
UPU bọn uwevwi rẹ uyono kpahẹ obenu vẹ okọrenu
ẹgua phiyọ otughiẹvwen. E sere isukuru rẹ Isodje
enu rẹ Sama (115). Emuo odẹ na vwọ karophiyọ
ọgnokọrenu Sama rẹ oghwuru ọke rẹ okọrenu rọye vwo
she guọghọ vwẹ Ekpe dẹvure. Ukoko rẹ Isikọlashipi
rẹ Salubi vwẹ Agbọn hwosa kẹ ihwo nẹ ayen kpo uyono
vwẹ isukuru rẹ sama na. Ihwo rẹ a sanọ kpo isukuru
na da dia ihwo ri wontọ no iyunivasiti re. Ayen
dia etiyin yono ẹgbukpe-erha kpahẹ obenu-
oreghereghe vẹ obo rẹ a gua okọrenu. Ihwo ri wontọ
nu e de ji ayen kpo Nigerian Communication
Satellite (NIGCOMSAT) Limited vwẹ Abuja kpo uyono
rẹ ẹgbukpe ọvo.
Ihwo ri wontọ no uyono vwẹ NIGCOMSAT nu e de ji
ayen ivivẹ kpo irere sansan obẹ inọko kpo uyono rẹ
ẹgbukpe ivẹ efa. Akpọbasaa vẹ Ọmọtughele kpo
Orenburg pilot school vwẹ Russia rẹ Yuri Gagarin
wontỌ nu tavwe ọ ke dia ohwo ẹsosuo rọ rhan kpo
obenu-oreghereghe vwẹ ukpe re 1965. Ayen ji te
RKK Energiya Museum ra mrẹ Vostok 1, okọrenu rẹ
Gagarin gua kpo obenu-oreghereghe na. Ọmọtughele
Efeturi ọyen ọmọtẹ rẹ Okparabe. O yono Urhobo vẹ
ona ephẹrẹ vwẹ Delta State University, Abraka. O ji
yono kpahẹ ikọmputa vwẹ Umukoro Mohwo Iyunivasiti.
Ọ sa jẹ, oji nyo ephẹrẹ ẹrẹren.
Ẹkowa Agaren ọyen isodje enu rọ gua okọrenu vwọ
họnre vwẹ ofovwi rẹ Gowon vẹ ojukwu dẹvure. Ọ nabo
vwo erianriẹn vẹ evwomariẹn rẹ okọrenu ẹgua.
Omaroọye ohwo rẹ Ẹkpan rẹ Uvwiẹ. E jiro vẹ
Akpọwẹnẹ Iboyi kpo Johnson Space Center rẹ NASA
vwori rọhẹ Houston, Texas vwẹ Amẹrika. Akpọwẹnẹ
ohwo rẹ Idjerhe. O yono mẹkanika Ẹnjiniarini vẹrhe
vwẹ Umukoro Mohwo Iyunivasiti vwẹ Evwreni. ọ vẹ
Ekowa kpo Amẹrika re yono kpahẹ ẹgua vẹ ẹrhuẹrẹ te
ẹro-evwote rẹ okọrenu.
Ejiro Ọmọnefe ohwo rẹ oviri-Ogọ. Oma rọye
oyono rẹ ikun-awanre vwẹ Delta State University,
Abraka tavwe o ki kpo uwevwi re ronvwo oma. O yono
ẹbe kpahẹ ikun awanre rẹ inaijiria vwẹ University
rẹ Inaijiria vwe Nsukka. Ejiro vẹ Ọghẹnẹrọ
Mijitotu eyen e ji kpo Xinchange Satellite Launch
Center vwẹ Xinchang obẹ China ra fuẹrẹ obo rẹ oyan
rẹ obenu-oreghereghe rayen wanre. Ọghẹnẹrọ ọyen
ọmọtẹ rẹ Okere-Warri rẹ o wontọ no Iyunivasiti rẹ
Ibadan vẹ idigri rẹ ivẹ vwẹ ekọrame ẹbon tavwe o ki
kpo inọko re yono kpahẹ obo rẹ a bọn ekọrenu.
Ọnajite Ukọmọ vẹ Okẹ Akpọsoso kpo uyono vwẹ
Armed Forces Medical College (AFMC) vwẹ Pune, obẹ
India. Onajite Ọshare grinyan, ohwo rẹ Orẹrẹ vwẹ
Eghwu. O wontọ no Iyunivasiti rẹ Ẹko nu ọ da dia
ọbo rode ro sun Uwevwi rẹ oma esivwo rode rẹ Warri.
Ọsẹ rọye ọbo rode ro sivwi kọgan kọgan dẹvure vwẹ
Orẹrẹ-Eghwu. Ọsẹ rọye na orhuẹ jovwo. Dẹvure o
vwo kpo ibefi, ọ da mrẹ aziza rẹ ọ vọnye họnre.
Omarọye vwo phi aziza na kparobọ, aziza na da
kerianriẹn ọmọtẹ rẹ Agbarha-Warri. O wontọ no
Isukuru rẹ Inọsu vwẹ Warri ọ je wian vwẹ uwevwi rẹ
oma esivwo rẹ Uhwokori Kreki tavwe a ke rehọ phiyọ
owian rẹ oyan rẹ UPU na.
Egbukpe ivẹ na vwọ gba nu, ihwo na ejobi de no
inọko rhe. Ayen da ra vwomaba ewena vẹ ihwo efa re
wian owian rẹ okọrenu na ẹbọn vwẹ obẹ Ukoko Ewena
rẹ Susu (UES) vwẹ Okpar9-Olomu. Ayen dia etiyin de
wian ẹgbukpe ọvo fa tavwe ayen kerha vwomaba idjene
vẹ ihwo efa re wian vwẹ uwevwi ẹgbẹn rẹ Okugbe
Urhobo re fuẹrẹ obenu-oreghe-reghe (OUFO) vwe
Agbarho. Ayen dia etinẹ ẹgbukpe ọvo soso. Etiyin
ayen de kuo uyono rayen phiyo, re ayen vwọ rhavwọ
obo rẹ a rhan kpo enu nu.
Ẹkẹvuọvo, tavwe ayen ke rhan kpo obenu, ayen
kpo eha rẹ oma ẹsasọ vwẹ Uwevwi rẹ omesasọ rẹ
olympoiki rẹ Blessing Okagbare rẹ abọn kẹrẹ
istediọmu rẹ Oghara. Ayen no etiyi nu ayen de re
ru ọrhavwini rẹ ugboma vwẹ Uwevwi rẹ Orhavwini rẹ
Omakpokpo rẹ Odiete vwẹ Otọ-Eghwu. UPU ọyen rhie
uwevwi nana rẹ a da rehọ ọbara vẹ ekuakua rẹ ugboma
rẹ ohwo-rakpọ davwanẹ sẹ emiavwe hẹ oma na. E mu
odẹ rẹ Odiete vwọkẹ rẹ a vwọ karophiyọ Odiete
Diariarijere ro sunru vwẹ NCNC dẹvure o de mu
uwevwi rẹ eya de vwiẹ, ame rẹ ipọmpu, Isukuru rẹ
Isada rẹ Ẹghẹreka, kugbe Postal Agency rhe Eghwu
tavwe o ki ghwu vwẹ 1959.
Egbukpe ẹrẹren nag bare. UPU ghine ru, obo rẹ
ayen tare kpahẹ egbe emuo rẹ ukale ẹra rẹ obenu-
oreghereghe na. ure rẹ ukpe ẹrẹren na, vwẹ
emeravwe rẹ ururuvwe rẹ Urhobo vwọ ghwẹkoko rẹ a
vwọ riọ orẹ rẹ Urhobo soso vwẹ Uvwia-muge, etiyin
osun rẹ UPU ejobi, onini rẹ isodje ro ronvwomare,
Ẹkemọ Agbraran de ghwoghwo nẹ Urhobo muegbe na rẹ e
che vwo ji ihwo kpo obenu-oregheregbe re.
Ẹdẹ rivẹ rẹ orẹ na, ihwo rẹ Urhobo vẹ ihwo efa
sansan ri no inajiria vẹ Afika soso rhe da ghwẹkoko
vwẹ asa Agbada rẹ okọrenu na vwẹ Ẹdjẹba-Agbarha.
Ẹdẹ yena, enu ejobi pha hworhẹ hworhẹ, osio nama
biphiyọọ. Asa rẹ a bọn Agbada na phiyọ na, egbo re
ghwieri reghe-reghe. Agbada na ọ hẹ urherievie rẹ
asa re ghwieri na. oma rẹ ichiyi ujuorin esan no
uherevie na, a bọn umukpe riarẹ Agbada na phiyọ rẹ
inughe se mudia di no obo rephia. Umukpe na hẹre,
o ji kpenu te igbedabỌ iyorin. A jẹ gba omogba rẹ
itehru riariẹ Agbada na phiyọ sienẹ inughe je
etiyin ẹ yan te.
Tavwe a ke sa okọrenu na kpo enu, ebuine rẹ
Urhobo sansan de hworo ke akpọ vwẹ etiyi. Ema rẹ
Ughele gbe igbe. Ukoko rẹ ebuine rẹ Udje rẹ
Ughiẹvwen rẹ Udu son une ọvo kpahẹ oyan na:
Nonẹ ẹdẹ orẹ rode
E he
Urhobo, ọgbare e!
Ihwo r’ Urhobo
Kp’ ukale ob’ Ibadan
Mi nyori
Kpeha kp’ ukale vw’ Aka
Me riẹnre
Ukale ro’ oregberegbe
Ke mavỌ mi gbe ikun roye?
Nonẹ ede orẹ orde
Kete kete wo nurhie
Ihwo r’ Urhobo ejobi
Kpo ivwioni re evu re!
Okọrenu na mudia garọ unu vie enu vwẹ enu rẹ
agbada na. Ọpha kirẹ ekọ erha rẹ erha imudia kẹrẹ
ohwohwo e da tanmuohwohwo. Ọfa na rhoma tanmuy ọrẹ
uherevie na. Ọ rẹ uherevie na ọyen ma rho kparobọ.
Ọnana ọyen mu ofigbo re cheri no okpa rẹ urhobo
rhe. Ọfigbo nana ọyen che mu ẹgba rẹ inini rẹ
okọre-nu na vwọ wian. iuvẹ richekọ obonẹ vẹ obonẹ
re ọrode na kerha uvi rẹ okọrenu na. Oyibo se ayen
“Rocket Boosters”. Ena eyen ẹgba rẹ okọrenu na cha
vwọ kparoma no otọ vẹ ophephe rẹ akpọ na vwọ vrẹ
abọ rẹ ọtamu rẹ akpọ na rẹ ọ sa vwọ ruọ obenu-
oreghereghe. Ọ rẹ ọ tanmu enu rẹ orode na ọyen okọ
na dẹen. A gharọ ẹkẹ erha. Ubro obenu na e se
Ekpọfia rẹ okọ na. Ọ da dia nẹ a sa okọrenu na no
otọ nu, e teree, emu vo da chọ, okọrenu na da guọnọ
she, Ekpfia na ko che si ihwo na evurọye na ejobi
no, ko che mu ayen totọ dẹdẹen vẹ ibrobro rode.
Ubro rẹ uherevie na ọyen uwevwi rẹ ihwo na cha dia
bẹsieyen ayen vwo no obenu rhe. Etiyin emu rẹ ayen
cha re epha. Etiyi ame rẹ ayen cha da je epha.
Kemu kemu rẹ ubro rẹ uherevie nana re se utughẹ rẹ
Akpọ. Ubro nana ọvo oyen se rhinvwi cha akpọ na,
kidie erichekọ na ejobi tuan kufia vwẹ obenu-ore-
ghereghe. Ubro rẹ obotọ rọye na ọye e se utughẹ rẹ
ijini. Etinẹ ọyen ijini rẹ irhukpẹ vẹ aphopho rẹ
arhọ epha. Onana nẹrhẹ emu raye se djiro kọke.
Kọke vwẹ evun rẹ ekpeti rẹ udjidjiro. Siẹrẹ uvi na
ivẹ na da ton kfia nu, utughẹ rẹ ijini na kọye
nẹrhẹ okọrenu na sa rhan no asan kpo asan vwẹ
obenu-oreghereghe.
Ihwo re wian owian vwẹ Uwevei rẹ Eravwo Esio rẹ
Onobrakpeya vwẹ Agharha-Otọ eyen ke si obo rẹ ofori
okọ na dia tavwe e ki vwo rhe Ukoko Ewena re susu
obẹ Okparẹ-Olomu ayen ke bọn.
Ọren vwo vi uyovwi nu, ovwọvwọ vwọ kẹkẹ re,
Ẹkowa vẹ out rọye da ruọ okọrenu na ọvuọvo. Ẹkowa
Agaren ọyen osun rẹ ihwo na, ọ je dia ochuko vwọke
Akpọbasaa Umukoro rọ cha gua okọrenu na.
Ọmọtughele Efeturi ọyen cha rehọ ekuakua rẹ
ikọmputa vẹ iteliskopu vwo no enu na no ọke kpo
ọke. Omarọye je cha rehọ ifoto rẹ obo rẹ ayen
mrẹrẹ, ọ me je rehọ ayen vẹ ovuẹ vwo kpo obo Uwevwi
Ẹgbẹn rẹ a da fuẹrẹ obenu-oreghereghe (OUFO) vwẹ
Agbarho. Akpọwẹnẹ iboyi ọyen ọwena rọ cha vwẹro te
ijini vẹ ugboma rẹ okọrenu na. Ọnajite Ukọmọ ọyen
ọbo. Te omarọye te Okẹ Akpọsoso, inọsu na cha
vwẹro te omakpokpọ rẹ ihwo ejobi vwe evun rẹ
okọrenu na. Ayen ihwo esan, eshare ẹne vẹ eya ivẹ
eyen kpo obenu na. Ejiro Ọmọnefe vẹ Ọghẹnẹrọ
Mijitotu vwoma ba ihwo re cha dia uwevwi Egbẹn na
obẹ akpọ obonẹ da fuẹrẹ obo rẹ okọrenu nay an wan
vwẹ obenu.
Irhuon rẹ ihwo ri kpo oyan na irhuon re djẹ
ekpahe. Efeludu ọyen e vwo ko ayen. E phi emwa
elọlọhọ efa phiyọ obẹ erivwi rẹ iwun na ifi rẹ
irhuke jerọ rẹ ayen sa chẹrẹ phiyo inu sansan vwẹ
evun rẹ okọrenu na ọ de nẹrhẹ odju rẹ okọrenu na ọ
de nẹrhẹ odju rẹ ekpahe yẹrẹ oheri ruọ ayen oma
kirẹ obo rẹ ayen guọnọ re.
Ayen vwọ ruọ okọrenu na bọ, emu ọvo de she no
obọ rẹ Ẹkowa teyọn otọ.
“Oyẹn die?” Onajite da nọ.
“Oyen ọrhan mẹ”.
Ayen ihwo ejobi da hwẹ. Akpọwẹnẹ da nọ, “Ọsẹ;
wẹ je gọ edjọ?”
“Ọ vwọ ọsẹ rọye be gọ” Ẹkowa da ta kẹ ayen.
“Ọrhan nana ọyen sivwi vwe kpo ofovwi rẹ ibiafra ra
rhinvwi rhe”.
“Ọghẹnẹ ọyen sinvwi we ra rhe, ọsẹ” Ọmọtughele
ta nu kọ hwẹ.
“E, Ọghẹnẹ sinvwe” Ayen ejobi da ruọ okọ-renu
na.
Ayen vwỌ ruỌ okỌrenu na nu, ihwo ejobi ke hẹrhẹ
vẹ ẹwẹn rẹ oshọ vẹ omavwerho-vwẹ. Ayen de nyo
umirirẹ ota ro no ọgban agboro cha:
Urhobo vẹ isi re gbare
Ovwanvwan kerhọ
Nonẹ ẹdẹ rode vwỌkẹ Urhobo vẹ inajiria
soso.
Ihwo rẹ avwanre kpo isiorho vwẹ
Obenu-oreghereghe
Obo rẹ ayen mre vwẹ oboyin
Ayen cha ghwa rhe.
Ukeri n ache keri no ighwren kpotọ
re te odiodi
o de te odiodi, okọrenu na kọ cha kparọ
oma kpenu.
Etiyi e-de se orhirẹ rẹ Ọghẹnẹ ọvo, ọ da
nẹrhovwo rẹ oyoghwere vwọkẹ ikpukale na. Ọ je nẹ
vwỌkẹ Urhobo, inajiria vẹ akpọ na soso rẹ e vwo vwo
ufuoma.
Ukeri na ko muphiyọ. O vwo te erha, ivwi-rhi
ki no unusọn rẹ utughẹ rẹ ijini rẹ okọrtenu na cha.
Ọsho de mu ihwo buebu sẹ okọ na tuan. Esẹ vẹ init
e iniọvo rẹ ikpukale na evo mu ebo nene oma rhe
jovwo. Ayen de dju ifue raye vwẹ odju na. Evo
phopho ọrhen vẹ ẹbo fa ruọ odju na. ukeri na vwo
te odiodi, okọrenu na da kparoma no otọ. E no yẹ ọ
yanra. Ibrẹro na, ivwirhi re vọn etiyin ọvo kọye
ihwo na mrẹ. Ine rẹ aghọghọ rẹ Urhobo da vọn ọgban
agboro na vẹ aphopho na ejobi.
Ọmọ ọke krẹn rẹ okọrenu na vwọ ruọ obenu nu,
ayen da mrẹ nẹ ayen phorhe vwe evun rẹ okọrenu na.
Etiyin osun Ẹkowa da ta ota kea yen ejobi.
“Dohwo de umwamwa rọye churu gan” Umwamwa na
ọyen e ru phiyo agbara rẹ okọrenu na. Ohwo de
chedia kọ rehọ umwamwa na vwọ wan ehun rọye, ko
churo mu agbara na.
“Mavọ kọye ohwo sa vwọ yan?” Okẹ da nỌ osun
raye. “Kidie me guọnọ kpo enyuwevwi.”
“Ovwavwa kerhọn,” Osun Ẹkowa da vue ayen. “Wọ
da guọnọ yan no asan kpo asan, ẹsosuọ gbe mrẹ
unurhoro rẹ asa wọ guọnọ ran a. Wọ da rehọ oma wẹ
vwo vio unurhoro na nu, gba rehọ obọ wẹ vwo chu
igbẹrẹn yẹrẹ emu rọ kẹrẹ owẹ. Ọtiọye na kẹ wọ cha
rhan kirẹ ọphran.”
Ayen hwo ejobi da hwẹ. Okẹ ghini vwọ davwọ ọ
da wian. Ọtiọna kọye ayen vwọ yan no asan kpo asan
vwẹ obenu-oreghere-ghe na kidie ọnye h9 oboyii.
Kemu kemu phorhẹ. A je vuẹ ayen ọke rẹ ayen vwo
kpo uyono vwẹ ayen ọke rẹ ayen vwo kpo uyono vwẹ
obo akpọ jovwo. Ẹkẹvuọvo, obo rẹ ohwo nyori vẹ ọrẹ
ọ mrẹre dia ọvoo.
Ayen vwọhẹ oboyi na ayen da mrẹvughe nẹ obenu
na ghinẹ irareghe rode. O vwo obaa. Oyan ro
muayen yanra epha buebu. Ihwo buebu obo akpọ ta nẹ
ayen kparo mrẹ akpọ ọfa obenu rẹ e se Gootan. Ayen
je ta nẹ eka rẹ ihwo evo dia ri vwo ekọrenu re gan
vrẹ erẹ ihworakpọ. Urhobo guọnọ riẹn sẹ asa ọtiọye
ghine rọ. Ayen je guọnọ riẹn sẹ ughwu vẹ orhan ji
te oboyi. Enana usun rẹ obo ri mu ayen kpo oyan
na.
Ikpukale na ji che te Uwevwi Idadeghe rẹ ihwo
rẹ korho korho rẹ ihwo rẹ Amirika, Irosha, itili,
Ijapani vẹ asan efa dia de wian vwẹ obenu-
oreghereghe na. Ayen cha mrẹ obo rẹ owian na tere.
Aye ji cha fuẹrẹ obenu na sẹ a sa mrẹ obo rẹ e
sa ghwe erhuvwu rhe kẹ owian rẹ okpa ẹbẹrẹ vẹ owian
fa sansan rẹ ihwo rẹ Urhobo.
Ẹsosuọ, kẹ okọrenu na ke bi riariẹ akpọ rẹ
ihworakpọ na.
“Dia obone de rehọ ifoto rẹ akpọ na wo vwo rhea
yen obio akpo” Ẹkowa ta kẹ Ọmọtughele. “mi nyori” Ọ
vwọ rehọ ifoto na nu, ayen ejobi da mrẹ vwẹ ughegbe
rẹ ikọmputa rode rọhe igbẹrẹ rẹ okọ na.
Ọ rehọ ayen awa ọvo gbẹ ubro tavwe ayen ki se
bi riariẹ akpọ na obọ ọvo. Ayen vwo bi riariẹ nu kẹ
osun Ẹkowa tare nẹ ayen ke rehọ vwo vi obo akpọ ofa
obenu rẹ e se Gootan na.
“Ọmọtughele,” Ẹkowa de se,
“Ọga mẹ”
“Rehọ onuẹ kpo Uwevwi Ẹgbẹn obo akpọ tanẹ
avwanre garọ vi obo Gootan re.”
“Mi nyori”
Ọmọtughele nyẹ ibi sansan vwẹ ikọmpute na. oka
rẹ edo ọvo da phia. Ọmọtughele da ta ota, “Ọna
avwanre vwẹ ovue cha obo akpọ na. Ọyen”.
Ayen ejobi de nyo urhuru rẹ Ọghẹnẹro no obo
akpọ rhe.
“Mi nyo we. Gba tar he. Ọyen.”
Ọmọtughele da vwẹ uphẹn kẹ osun Ẹkowa siẹnẹ ọ
vuẹ ovuẹ na.
“Mẹvwẹ osun Ẹkowa rẹ okọrenu Urhobo ro kpo
obenu-oreghereghe. Avwanre te obonẹ gbẹsẹnẹdẹ.
Asia ọke pha na, avwanre garọ vi obẹ Gootan re.
Ọyen.
Ọghẹnẹro da kpahe rhe,”Ovwavwe Kobiruo. Ovwavwa
yan oyoghwerẹ o. Ọyen”.
Ọtiọtiọna, ayen vwọ rhan yanra na jẹ ayen rehọ
oruẹ vwo kpo obo akpọ kẹdi kẹdẹ. Ayen rhan vrẹ
isio sansan rẹ ayen mrẹn rẹ ayen vwọhẹ obo akpọ
jovwo. Ayen mrẹn isio erha re se okọ ofovwi, ayen
je mrẹ Emetẹ Erha “Oghẹnẹ kugbe ọhọ vẹ epha ayen da
mrẹn ayen vwẹ obo akpọ. Ọmọtughele rehọ ifoto rẹ
isio na, o da rehọ ayen vwo rhe iohwo rẹ obo akpọ -
wan evun rẹ ikọmputa na.
Ẹkowa dje isio erha evo kẹ ihwo ichekọ na vwe
evun rẹ ughegbe rẹ ikọmputa na. Ọ da vuẹ ayen,
“Isio nana erha na eyen e se, Tatamulele,
Tanumeketa vẹ Atanuareyọ. Oni mẹ rehọ edẹ raye vwọ
son ine kẹ avwanre ọke emọ”.
Ayen da hwẹ.
Ayen rhan re edijana ẹrẹren re. Sievuọvo na,
ayen gbesa ta ota vwo rhe ihwo rẹ obo akpọọ. Ayen
gbijise nyo mie ayeen, yẹ ọ dia nẹ ikọmputa na
miovwirii. Akpọwẹnẹ rọ rhuẹrẹ ekọrenu davwe bẹn,ọ
mrẹ emu vuọvo rẹ ọ gbwarọ rhee. Ọmọtughele kọ vuẹ
ayen nẹ oyen nyo eta phorophoro vwẹ egbeti agboro
na.
“Eta na cha vwẹ ephẹrẹ sansan rẹ obo akpọ”.
Okẹ da kpahe phiyọ, “mavo e se vwo nyo ephẹrẹn
sansan obo?”
“Ẹhẹn,” Onajite je kpahe phiyọ “Ọ dia ihwo rẹ
Urhobo ọvo eyen wian owian vwe evun re Uwevwi Egbẹn
na vwe obo Agbarho?”
Ọmọtughele da kparọ obọ kpenu. ọ nabọ rhuẹrẹ
ọgban agboro otete rẹ erhọn rọye na phiyọ ẹdia.
“Vwa kerhọn…”
Ayen ejobi nọfọ tovwin.
Ọmọtughele da ta, “Ọna dia obo akpo eta na nẹ
chaa.”
“Die?” Osun Ẹkowa kperi. “Kẹ bovọ?”
“Me riẹnree”
“Phio phiyọ ọgban agboro rode na ihwo ejobi nyo
eta na.”
Ọmọtughele ghine phio phiyọ ọgban agboro rode
rọhẹ oma rẹ okọrenu na. eta sansan vwẹ ẹphẹrẹ
sansan keye no ọgban agboro na cha.
“Ovwavwa kẹ obẹcha!”
“Amedi o!”
“Bittesechr”
“Ẹkabọ!”
“Irasshai!”
Eta na je cha ọtiọtiọye, o de gbe ayen unu.
Akpọwẹnẹ da ta, “Ihwo ejobi riẹnẹ nẹ ota ẹsosuọ na
Urhobo ọyen ohwo na jẹre”
“E” okẹ da kpahephiyọ “Ọrẹ ivẹ na ọyen ikalaba. Me
dia oboyi jovwore”
“Die ọrọ ivẹ na mudiaphiyọ?” Ẹkowa da nọ.
“O mudiaphiyọ nẹ ‘we kẹ obẹcha’”. Okẹ da vuẹ.
Ọmọtughele da ta, ota rẹ erha vẹ ọrẹ iyorin na jẹ
ota vuọvo na. Ọrẹ erha na igẹmani, ọ rẹ iyorin na
ephẹrẹ rẹ ihwo ri Ijapani. I mudiaphiyo ne, ‘Ovwavwa
kẹobecha’”.
“Ọ rẹ ẹnẹ na Iyoroba”, Akpọbasaa da kpahephiyọ “Jẹ
ota vuọvo na ọ ta”.
“Bovọ kọye a ra na’” Okẹ da nọ. “Obẹ erivwin gbinẹ
obẹ ẹgbẹn rẹ akpọsoso?”
Ẹkowa da ta, “obọ eravwọ na pha na, ọhọ-họre nẹ
ihwo na mre omahwo re, jẹ a mrẹ aye. Ọmọtughele, no
ughegbe na wọ vuẹ avwanre asan rẹ omahwo pha enẹna”.
“O gbe dia nẹ obẹ Uwevwi Idadeghe rẹ ihwo rẹ korho
korho na ọyen a ran a?” Okẹ da nọ A mre ohwo kpahe kẹẹ.
Ọmọtughele da nyẹ ibi vwẹ ikọmputa na, ifoto rẹ
idadeghe na da phia vwo. Ihwo ri chekọ mrẹ emu vuọvoo,
jokpẹnẹ isio ọvo. Osun Ẹkowa da nọ, “Die ọyen Ikọmpasi
na ta?”
“Ọ dia obẹ Uwevwi Idadeghe rẹ Ihwo rẹ korho korho
na ọyen a je pha. Ẹkẹvuọvo, e ji te asan rẹ edi se nyo
eta rẹ ihwo rẹ oboyii”.
Akpọbasaa da ta, “kọnye a riẹn asan rẹ eta na nẹ
chaa, yẹ ena eta rẹ ephẹrẹ rẹ ihworakpo?”
“Meriẹnree” ọyen Ọmọtughele kpahe kẹ.
siẹvuọvo na Akpọbasaa da kpọ okọrenu na gẹre kpo
obọhwẹre. Ihwo ri chekọ phiẹwẹn-phiyọ, ọ da nẹrhe ayen
rhan no oto vwẹ oma tẹyọn igbẹren rẹ ọkọrenu na.
“Osun Ẹkowa da nọ “Ọyen die?”
“Me mrẹ oravo nanana kirẹ ukuta vwẹ obaro mẹ”.
“Ọmọtughele, guọnọ vwẹ ughegbe na” Ẹkowa da ta kẹ.
Ọ vwọ nyẹ ibi, ọ da mrẹ.
Ọna akpọ ọfa rẹ obenu”
Ayen ihwo ejobi de no. Ọ do vrẹ akpọ rẹ ihworakpọ
na.
“E wonto vwẹ etinẹ tavwe, a mrẹ obo rẹ ọ pha?”
Akpọbasaa da nọ osun Ekowa.
Ekowa da ta, “Ja nabọ fuẹrẹ tavwe. ọ pha kirẹ
emeranvwe na, dede nẹ ọ do vrẹ”.
Ayen vwo siẹkẹrẹ na kẹ ayen mirẹre nẹ iwevwi e rọ.
Ize rẹ a vwọ kanrọ iwevwi na kugbe otọ rẹ orere na lo
wranwran-wran kirẹ oro. Orere na vwo ogba rẹ a gba
riariẹphiyọ. O ji vwo unurhoro rode. Ohwo ọvo mudia
unurhoro na. No asan unurhoro na re kpo obo otafe,
idjerhe grongro erọ rẹ o ji lo kire oro. A kanrọ echẹ
rode rẹ unurhoro na, ọhare na rẹ o mudia otafe rẹ
unurhoro na yọnrọ usiaphrẹ rode vwẹ obọ-hwẹre rọye. Vwẹ
obọrhen rọye kerha vwẹ ọlọkọ. Ihwo buebu yan vwẹ
idjerhe na bro ọshare na ra, a mrẹ obo rẹ idjerhe na vẹ
asan rẹ ayen nẹ chaa. yẹ, ayen de te unurhoro na,
ọhare na mi rhie echẹ rode na kẹ ituevo, ituefa, o rhie
kẹ ayeen.
“Wonto vwẹ asa ro phẹnre vwẹ idjerhe na”, Ẹkowa da
vuẹ Akpobasaa.
Ayen vwo wontọ nu, ayen day an nene ihwo re yan ruọ
ogba na. Ọshare na da kparọ ọlọkọ rọye na kpenu kẹ
ayen vwẹ asan unurhoro na.
“Ọvwavwa mudia etiyin,” ọ da vuẹ ayen. “Ki-die
ovwavwa hwo esan nana ji ghwuu”.
Okẹ da nọ Onajite memerha, “Die ọ ta na?”
Oshare na da ta, “Etinẹ Urhoro. Mevwẹ Orhurhoro.
Ihwo ri ghwure, rẹ e je riẹn ghwu eyen ọvo ruọ obonẹ”.
“Mavọ wẹsa vwọ jẹ Urhobo?” Okẹ da nọ.
“Ọghẹnẹ ọyen man kephẹrẹ kephẹrẹ. Ọrẹ ọ guọnọ jẹ
ọyen ọ jẹ. uwevwi rẹ Ọghẹnẹ ji vwe ọyen me yan na.”
“E” orhiurhoro da kpahe kẹ. “Asiaọke-phana, tẹ
ọkpo, te ifue, te erhanrẹ ovwavwa ghwa rhe ejobi e shua
nure. Ugboma rẹ ovwavwa ji che hirhe phiyọ erhi,
kidie, Ọghẹnẹ guọnọ nu, oma ko ruo ikpukale na
fanfanrhiẹ.
Ẹkowa de kperi, “Ọrhan mẹ.”
Okẹ da ta, “Ọrhan vọ? wo nyo obo a tan a?
Obọ Onajite ru emu ọvo. Ekpaye che hwevwe kufia”.
sievuọvo na, ayen gbe sat a ota ọfaa. Ayen vwọ mrẹ
oma rayen, ayen vwọ mrẹ omaraye kẹ evun rẹ orere na.
Orere na lo wranwaranwran, kidie oro ọyen e vwo ku
idjerhe rayen ejobi. Elo rẹ urhukpe rode ọvo vọn asa
ejobi, yẹ ifi rẹ irhukpe e rọọ. Ayen vwọ yan emerha,
amakashi vẹ ibekpe esan de sun ayen kpo asan ọvo.
Etiyin ayen da mrẹ emekashi vẹ ihworakpọ buebu.
Emekashi na evo vẹ ihwo evo jẹ Igbo, efa jẹ iyibo, evo
je ghwa jẹ Evwẹrẹ. Ọrẹ ọ rehọ ikpukale na yanra na, jẹ
Urhobo vwọkẹ ayen.
Obẹ ure rẹ asan na, a rhuẹrẹ egbara ibro phiyọ.
Ohwo ọvo chidia agbara ọvo, a sa nabọ mrẹ opharo rọye
tee, kidie olo wranwran-wran kirẹ ọren na. Elo nana
ọyen vọn orere na ejobi kirẹ urhukpẹ na. ikpukale na
vwọ mrẹ elo na ayen de guegue.
Ọrẹ o lo kire urhukpe rode na da kparu-nu ta, “ihwo
rẹ Urhobo, ovwavwa kẹ obẹcha. Me riẹnre nẹ ukpokpoma rẹ
ovwavwa ph buebu vwẹ obo Urhobo. Oshọ rẹ ughwu vẹ
orhan kpokpo ovwavwa omamọ, yẹ me kẹ kohwookohwo ogaga
rẹ o se vwo yere akpọ. Ovwavwa che phikparobọ siẹrẹ
ovwavwa de vwo oru-kugbe vwẹ Urhobo. Vwọkpahẹ eravwo
richekọ ri mu ovwavwa rhe ukale obenu-oreghere-ghe na,
a cha kẹ onwavwa uyono krẹn vwẹ etinẹ tavwe ovwavwa ki
kpo.
Ọ ta nu, o de se amakashi ọvo nẹ o sun ayen kpo asa
rẹ a da kẹ ayen uyono. Ayen de shiguẹ abọ buebun.
Amakashi na kea yen oka rẹ emu ọvo ọpha kirẹ ọne re
duvwuru ọ da ja hrẹhrẹhrẹ.
“Ọnana ọyen e se mana. Ọna emu rẹ emekashi.
Ayen re nu, o te ibrẹro iyorin, uyono na re nure.
Oma da vwerhọ ayen, kidie, ayen vwo erianre mamo re rẹ
obo rẹ ekankọ se vwo yovwi, vẹ obo rẹ obo rẹ ekankọ se
vwo yovwi, vẹ obo rẹ okpa ẹbẹrẹ sa vwọ rhoma rhọnvwọ.
Ayen che vwo kpore, amakashi na da vuẹ ayen nẹ ayen
karohọ obo rẹ Ọghẹnẹ vuẹ ayen kpahẹ orukugbe rẹ Urhobo
na.
Ayen vwo te Urhobo, Orhiurhoro de kuo ugboma rayen
rhẹriẹ kpo oma rẹ ihworakpọ. Sievu ọvu na kẹ ayen no
oma raye so nẹ ayen rhoma ghwo omamọ.
Okẹ da vuẹ Onajite,”No esha vọn uyovwi wẹn ejobi!”.
“Wo kpo Ọkokuaye nure, Okẹ” Ọ da kpahe kẹ.
“Die phia na vwo?” Akpọbasaa da nọ rẹ o vwo no
Ọmọtughele.
Orhiurhoro da ta kẹ ayen, “ibrẹro krẹn kirẹ
iphiorin Ọyen ovwavwa dia evun rẹ odjivwu na.
Ẹkẹvuọvo, ẹgbukpe ihwe”.
“Mavọ ọ sa vwọ dia ọtiọye?” Akpọwẹnẹ da nọ “Kọye mi
kpo omare re vwo”.
Ayen vwọ yan te okọrenu raye, odin din rhurho r, kẹ
ayen wiẹn odin na no asa echẹ rọye. Ayen vwọ ruọ evun
rọye, kẹ o ghine mu ayen ẹro nẹ o te ẹgbukpe ihwe ayen
yan jovwo re. Akpọbasaa davwọ okọrenu na, ijini rọye
wianree. Akpọwẹnẹ day an kpo obo rẹ inini nap ha. Ọ
da wian owian vwẹ etiyi kirẹ oma rẹ awa erha. O se ru
emu vuọvoo. Ẹkowa da ta nẹ ọyen yan bro orhiurhoro ra
ọyen rehọ ukẹcha mie. O kriri, ọ da rhoma ruọ okọrenu
na.
“Wo be ra ọfaa?” Akpọwẹnẹ da nọ.
“Evu rẹ ophephe na ọyen omahwo de phorhẹ, Te
orhiurhoro, te Urhoro, te orere na hrẹ no etiyi re”.
Ẹkowa de chedia vwọ obọ cha egban.
“Die wọ tan a”” Akpọbasaa de kperi.
Ugege yena, ayen da mrẹ amakashi ovọ ro mudia kẹrẹ
Akpobasas vwẹ asa rẹ ọguo- kọ na chedia na. Ọ nyẹ ibi
evo nu, inini na da rehọ. Okọrenu na de mu owian
phiyọ. Ayen da nọ enano buebu kpahẹ obo re phia kea yen
na. Ayen je nọ kpahẹ obo re phia kẹ orhiurhoro vẹ
orere na. Ọ da vuẹ ayen nẹ ohworakpọ sa vwẹ ẹgbe rẹ
obọrọye yan guọno asan rẹ urhoro vẹ odjivwu phaa. Ọ
vuẹ ayen nẹ Ọghẹnẹ dje omaphia vwọkẹ ayen kidie, oja rẹ
Urhobo tere ẹwẹn omamọ.
“Ke idjerhe vọ ọyen asa nabo ga Ọghẹnẹ wan?” Okẹ da
nọ.
“Kpo obo akpọ ra guọnọ otọ rọye. Emekashi ghwoghwo
iyesirii.” Ọ ta otiọye nu, ọ da rhoma karophiyọ ayen
ovuẹ rẹ orukugbe rẹ Ọghẹnẹ vuẹ ayen kpo na. O de hrẹ.
Ọke nana ejobi na vwẹ obo akpọ, uwevwi rẹ Ẹgbẹn rẹ
Agbarho bi nyo mie okọrenu naa na, kẹ ayen vwẹ orue rhe
ukoko rẹ NIGCOMSAT vwẹ Anmerika vẹ ihwo rẹ Irẹsha nẹ
ayen nene ayen guọno okọrenu rayen ro ghwuru vwẹ obenu-
oreghereghe.
Ikpukale na vwo rhinvwi cha obo akpọ, ayen da
vwẹriẹ uwevwi rẹ idadeghe rẹ ihwo rẹ korho korho na.
Etiyin, ayen mrẹ ihwo rẹ Amirika, Itili, Ijapani,
Iyuropu ejobi vẹ ihwo rẹ Irọsha te Ishaina re wian
owian vwẹ etiyin. Ayen vwo gbe ikun rẹ obo rẹ ayen mrẹ
re vwẹ obo odjivwu, o mu ayen ẹroo. Osun rẹ uwevwi na
da vuẹ ayen mẹ ọ vrẹ egbu-kpe uje ayen kiẹn vwẹ enu-
oreghereghe na re, nẹ ayen je mrẹ odjivwu dẹvo, kẹ mavọ
ihwo ibiebi rẹ Urhobo rẹ rhere bọ sa vwọ mrẹ? Ọ je ta
nẹ odjivwu asa vuọvoo.
Ẹkowa da nọ, “kidie nẹ wẹ je mrẹ na koyẹ sorọ vwẹ
vwọ ta nẹ wẹ je mrẹ na koyẹ sorọ vwẹ vwọ ta nẹ odjivwu
rọọ?”
A nẹ ọtiọye. Ekowa kọ tare nẹ akpọ efa re vọn enu
na rẹ ayen mrẹ dẹvoo na, kọye e je rọọ.
Dede nẹ iyibo na no ihwo rẹ Urhobo na fiemuu,
fikirẹ uyono rẹ a kẹ ayen vwẹ obo odjivwu na, ayen da
wian omamọ rẹ owian vrẹ iyibo na ejobi.
Ayen vwọ ruọ ophephe rẹ akpọ na re, ayen da davwoma
rẹ ayen vwẹ ovuẹ rhe Uwevwi ẹgbẹn rayen vwẹ Agbarho.
Ayen nyo emu vuọvo mie ayeen. NIGCOMSAT kọye nyo ovuẹ
raye. Ukoko nana da rehọ ovuẹ rhea yen nẹ uwevwi ẹgbẹn
rẹ obo Agbarho na fue owian ikpe iyorin re wan vrẹ re.
NIGCOMSAT de sun okọrenu na wontọ dẹdẹn vwẹ asa rẹ
ekọrenu de wontọ vwẹ Abuja.
Ikpukale na vwo te obo Urhobo, eravwọ buebu wene
re. Ihwo rayen kparọirorovrẹ ayen re. E rori nẹ ayen
ghwuru rhadẹye kidie, emu vẹ egbe rẹ ayen mu yanra dia
emu rẹ ayen chasa vwọ dia obenu-oreghe-regbe ẹgbukpe
ihwee. Ọtiọye na, a rehọ eya rẹ Onajite vẹ Ẹkowa vwo
ru eyuku. Ikrun raye gharọ eya na kẹ iniọvo raye re.
Aye rẹ Ẹkowa vwiẹ emọ ivẹ re. Ọrẹ Onajite vwiẹ emọ
erha re. Emọ raye ghwanre ganre. Ukpokpoma n ate ọsẹ
rẹ Akpọbasaa ẹwẹn omamo, o de mu ọgan rẹ ubiudu, o de
ghwu ikpe ẹne re wanre na.
E wene ode rẹ UPU kpo Urhobo re. Enẹ-na ke se
ukoko rẹ Eyahobaro rẹ Urhobo (UEU). Ukoko na ji yono
emọ rẹ ikpukale na kpo iyunivasiti re. Ayen je hwa osa
rẹ kemeravwe kemeravwe kẹ eya, vẹ esẹ te ini rẹ
ikpukale na.
Osun ejobi rẹ UEU ji ghwu re. Ọrẹ ọkpo-kpọ na vwo
nyo nẹ ikpukale na rhe re, o de se ẹguare ọkpakpata rẹ
UEU. Ihwo rẹ Urhobo ejobi da gba vwẹ uvwiamuge
Agbarho. Etiyin e de dede ayen phioma. Ẹkowa da vuẹ
ihwo rẹ Urhobo ovuẹ rẹ Oghẹnẹ vuẹ rhea yen.
Evwo no etiyin nu,ikrun rẹ Onajite rẹ Ẹkowa de
yovwunu kẹ emọ rayen. Ikrun rẹ Ẹkowa da rehọ aye rọyen
vwo rhinvwi kẹ. Onajite da ta nẹ oma vwo fu aye rọye
vwẹ orọnvwe kpokpọ na, ọyen gba gnọno kpokpo noo. Ọ da