BALANSA ABREVIÁ - centralbank.cw balans... · Kréditonan kontra no-residentenan ... Kréditonan...

BALANSA ABREVIÁ

Centrale Bank van Curaçao en Sint Maarten

BALANSA ABREVIÁ

Tur derecho reservá. Sin pèrmit no por multipliká, ni warda nada di e edishon akí den un base di dato outomatisá, ni por publiká nada den ningun forma ni di ningun manera, ni elektrónikamente, ni mekánikamente, ni mediante fotokopia, ni grabashon, ni di ningun otro forma sin konsentimentu previo, por eskrito di

Centrale Bank van Curaçao en Sint Maarten.

4

5CENTRALE BANK VAN CURAÇAO EN SINT MAARTEN

INHOUDSGAVEN

INTRODUKSHON ..............................................................................6

E BALANSA ABREVIÁ ......................................................................9

SPLIKASHON KÒRTIKU DI E PARTIDANAN DI AKTIVO ....... 10Kréditonan kontra no-residentenan ................................................ 11Kréditonan kontra gobièrnu ............................................................... 13Kréditonan kontra bankonan ............................................................. 14Sobrá Kréditonan .................................................................................. 14

SPLIKASHON BREVE DI E PARTIDANAN PASIVO .................. 16Obligashonnan na no-residentenan ................................................. 17Obligashonnan na residentenan ........................................................ 17Obligashonnan na gobièrnu ................................................................ 18Obligashonnan na bankonan .............................................................20Obligashonnan na sobrá residentenan ............................................24Kapital i reserva .....................................................................................25

FINAL .................................................................................................. 27

6

INTRODUKSHON

E tareanan primario di Centrale Bank van Curaçao en Sint Maarten (CBCS) ta: promové stabilidat di e moneda komun di Kòrsou i Sint Maarten, pèrkurá pa un sistema finansiero sano i promové operashon di pago safe i efisiente. Ademas, CBCS ta trese den sirkulashon plaka di papel i moneda, i ta duna e dos Paisnan konseho sea pidí o sin ku nan a pidi konseho. Tambe CBCS ta atministrá nos reserva di oro i divisa.

Solamente bankonan komersial i entidatnan (semi)gubernamental tin kuenta na CBCS; p’esei e bankonan komersial ta fungi komo intermediario entre CBCS i públiko (persona- i empresanan). E bankonan komersial ta lanta plaka di papel na CBCS pa por fasilitá esakinan na públiko. Prinsipalmente na fin di luna tin un nesesidat grandi di plaka di papel pa efektuá tur sorto di pago.

Konforme Statüt di banko, CBCS por fungi komo bankero di e gobièrnunan di Kòrsou i Sint Maarten. Ademas CBCS por duna gobièrnunan di Kòrsou i Sint Maarten adelanto pa enfrentá défisitnan temporal den kaha kontra un interes ku ta igual na e interes pa duna krédito. E gobièrnunan di Kòrsou i Sint Maarten tin diferente kuenta na CBCS.

CBCS ta ehersé supervishon riba entidatnan finansiero ku e meta pa promové un sistema finansiero sano. Por parti e supervishon en kuestion den supervishon monetario i supervishon prudensial.


Supervishon monetario ta konsentrá riba mantenshon di balor di e moneda komun. Ta, entre otro, a base di e funshon ei, CBCS ta beheer e reserva di oro i divisa. E supervishon prudensial ta protehé interes di depositantenan i otro akreedornan di e entidatnan finansiero.

Mayoria di aktividat di CBCS ta figurá den su balansa abreviá. E balansa ta duna un resúmen di e aktivo- i pasivonan, i tambe di kapital i debe di CBCS na fin di luna.

Konforme Statüt di banko (artíkulo 39), CBCS ta obligá di publiká un biaha pa luna e balansa abreviá. Loke ta interesante di e balansa abreviá ta ku e prinsipal partidanan ta forma núkleo di nos sistema finansiero. Por pensa, por ehèmpel, riba posishon di likides di e bankonan komersial na CBCS —ku ta loke, den sentido estrikto, ta konsiderá merkado monetario— i e faktornan korespondiente manera plaka di papel, posishon di likides di gobièrnunan i nos reserva di divisa.

Mediante e foyeto akí nos ta duna un bista mas kla riba e balansa abreviá, manera nos ta publik’é mensualmente den korant i riba website di Centrale Bank van Curaçao en Sint Maarten.

8

Verkorte Balans

Diferensia DiferensiaActivo 31-mrt-18 28-feb-18 Pasivo 31-mrt-18 28-feb-18

Kréditonan kontra no-residentenan 3,641.5 -44.4 Obligashonnan na no-residentenan 262.2 3.7Oro 996.2 4.5 Depósito di no-residentenan 262.2 3.7Divisa 2,645.3 -49.0Sobrá kréditonan 0.0 0.0

Kréditonan i títulonan di balor 672.0 113.6 Obligashonnan na residentenan 3,115.2 59.6

Plaka di papel i moneda den sirkulashon 473.6 10.6

Kréditonan kontra gobièrnu 0.0 0.0 Obligashonnan na gobièrnu 232.4 43.7Títulonan di balor den kartera 0.0 0.0 Pais Kòrsou 132.5 -6.4Agensia- i institutonan di gobièrnu 0.0 0.0 Pais Sint Maarten 97.7 50.1Sobrá Kréditonan 0.0 0.0 Antiguo Pais Antianan Hulandes 1.8 0.0

Agensia- i institutonan di gobièrnu 0.4 0.0

Kréditonan kontra bankonan 193.7 125.2 Obligashonnan na bankonan 2,299.6 0.5Rekening-courant banken 193.7 125.2 Kuenta korientenan bankonan 877.3 -8.4

Sertifikado di Depósito 109.0 -7.0Reservanan obligatorio 1,313.3 16.0

Sobrá Kréditonan 478.3 -11.6 Obligashonnan na sobrá residentenan 109.6 4.8Sobrá aktivonan 478.3 -11.6 Depósito di sobrá residentenan 49.4 3.5

Sobrá pasivonan 60.2 1.4

Activo total 4,313.5 69.2 Pasivo total 4,313.5 69.2

E Balansa Abreviá di mart di Centrale Bank van Curaçao en Sint Maarten(den mion NAf.)


Den e introdukshon nos a indiká ku e balansa abreviá ta duna un resúmen di e aktivo- i pasivonan, i tambe di kapital i debe di CBCS na fin di luna.

Nos ke elaborá ku mas detaye riba e partidanan ku ta figurá riba e balansa. Na man robes di e balansa ta paresé e propiedatnan i kréditonan, ku sa yama tambe aktivonan. E partidanan na man drechi di e balansa ta e kapital i debenan. Nan yama e pasivonan.

Aki ta sigui un ehèmpel di un balansa abreviá di CBCS. Den dje tin inkorporá e prinsipal kategorianan di aktivo- i pasivonan. E montantenan ta e total di e partidanan korespondiente riba e balansa na un momento dado. Accountantnan no a kontrolá e montantenan en kuestion, sino ku nan ta sirbi meramente pa ilustrá e asuntu.

Den e foyeto akí nos ta deskribí i splika e prinsipal partidanan.

E BALANSA ABREVIÁ

10

Na e banda di aktivo di e balansa ta duna e partidanan den dos kategoria, esta Kréditonan kontra no-residentenan i Kréditonan i títulonan di balor. Den loke ta sigui ta duna un splikashon di e partidanan i suppartidanan den kua e kategorianan akí ta ordená.

Na promé lugá lo splika e partidanan di e promé kategoria, esta Kréditonan kontra no-residentenan. Ta konserní e partidanan Oro, Divisa i Sobrá kréditonan.

SPLIKASHON KÒRTIKU DI E PARTIDANAN DI AKTIVO

DiferensiaActivo 31-mrt-18 28-feb-18

Kréditonan kontra no-residentenan 3,641.5 -44.4Oro 996.2 4.5Divisa 2,645.3 -49.0Sobrá kréditonan 0.0 0.0

Kréditonan i títulonan di balor 672.0 113.6

Kréditonan kontra gobièrnu 0.0 0.0Títulonan di balor den kartera 0.0 0.0Agensia- i institutonan di gobièrnu 0.0 0.0Sobrá Kréditonan 0.0 0.0

Kréditonan kontra bankonan 193.7 125.2Rekening-courant banken 193.7 125.2

Sobrá Kréditonan 478.3 -11.6Sobrá aktivonan 478.3 -11.6

Activo total 4,313.5 69.2


Kréditonan kontra no-residentenan

OroPrinsipal motibu pa CBCS tin reserva di oro ta prekoushon pa por enfrentá kualke krísis (kontratempu ekonómiko) òf atversidat (katástrofe natural). Ademas, internashonalmente ta konsiderá reserva di oro komo un símbolo di stabilidat monetario i ekonómiko.

E reserva di oro di Kòrsou i Sint Maarten ta data di despues di Segundo Guera Mundial. Esei pa motibu ku, durante e guera, Shell i Lago a risibí di aliadonan pago na oro pa suministro di produktonan refiná; e reserva tabata konsistí mayormente di moneda di oro. A base di preis riba merkado internashonal ta determiná balor di e reserva di oro. Mensualmente ta rebalorá e reserva i sea ta deskontá e resultado òf e partida Kapital i reserva na e banda di pasivonan di e balansa ta benefisiá di dje.

DivisaTa komprondé bou di término divisa ofisial, kréditonan di CBCS kontra entidatnan den eksterior. E kréditonan di CBCS ta konsistí, entre otro, di divisa, esta moneda ekstranhero, manera dollar merikano i euro. Tur pais mester di divisa pa nan por paga nan importashonnan i paisnan por gana divisa ora nan eksportá produkto i servisio. Nos divisanan, por ehèmpel, nos ta risibí mayormente di servisio ku nos ta brinda ekstranheria, manera turismo, servisio finansiero

12

internashonal i aktividatnan di e refineria di petroli. Reserva di divisa di Kòrsou i Sint Maarten ta konsistí prinsipalmente di dollar, komo mayoria di komèrsio ku ekstranheria ta sosodé via pago na dollar. P’esei for di 1946 kaba a disidí di mara florin antiano na dollar. Asina ta limitá te un mínimo fluktuashon di preis komo konsekuensia di kambio di tipo di kambio. For di desèmber 1971 balor di florin antiano ta igual na ANG 1,79 pa un dollar merikano. Pa logra mantené esei, CBCS mester pèrkurá pa na tur momento tin sufisiente divisa disponibel. Internashonalmente ta apliká komo norma ku reserva di divisa mester ta sufisiente pa kubri durante tres luna importashon di produkto i servisio.

CBCS ta outorisá bankonan komersial lokal pa nan fungi komo banko di divisa. E bankonan komersial outorisá mester paga CBCS derecho di lisensia pa esei. Mensualmente CBCS ta kobra e derecho di lisensia. E derechonan di lisensia ku CBCS kobra no ta forma parti di entrada di CBCS, sino ku banko sentral ta transferí nan kompletamente na e dos Paisnan, na proporshon di loke na kada Pais a kobra e derechonan. E bankonan di divisa ta sirbi di intermedio den operashonnan di pago entre públiko i ekstranheria. En bista di su responsabilidat pa stabilidat monetario, maneho di CBCS ta dirigí na mayor sentralisashon posibel di nos poseshon di divisa.


Sobrá kréditonan Kréditonan di CBCS kontra ekstranheria, ku no ta kai bou di divisanan ofisial, ta kai bou di Sobrá kréditonan. Nan ta bononan den kartera di CBCS, ku Antianan Hulandes i teritorio Insular di Kòrsou a emití. Komo konsekuensia di e saneamentu di debe, Estado Hulandes a tuma over dia 10 di òktober 2010 tur préstamo di sèn di Antianan Hulandes i teritorio Insular di Kòrsou, pa motibu di lokual CBCS a haña un krédito kontra Estado Hulandes.

Di dos kategoria di partidanan na e banda di aktivo di e balansa ta kréditonan kontra residentenan, ku a reuní bou di e kabes Kréditonan i títulonan di balor. E kategoria akí ta konsistí di e siguiente tres partidanan: Kréditonan kontra gobièrnu, Kréditonan kontra bankonan i Sobrá Kréditonan. A bolbe supdividí e partidanan akí den un o mas suppartida, ku lo splika mas detayadamente na kontinuashon.

Kréditonan kontra gobièrnu

E partida Kréditonan kontra gobièrnu ta konsistí di tres diferente suppartida, esta Títulonan di balor den kartera, Agensia- i institutonan di gobièrnu i Sobrá Kréditonan.

Títulonan di balor den karteraDen e suppartida akí ta duna un bista di invershonnan di CBCS den títulonan di debe di gobièrnunan di Kòrsou i Sint Maarten. CBCS ta tene e kartera akí tambe pa por hiba un

14

maneho di merkado habrí. Esaki ta referí na kompra o benta di bono di debe dor di CBCS ku bankonan komersial ku e intenshon pa influenshá nan posishon di likides.

Agensia- i institutonan di gobièrnuE partida akí ta abarká préstamonan ku CBCS ta fasilitá agensia- i institutonan di gobièrnu. Den pasado, por ehèmpel, Fundashon Stichting Wegenfonds Curaçao tabatin un préstamo serka CBCS, ku entretantu e fundashon a amortisá.

Sobrá KréditonanEsakinan ta konserní tur otro krédito kontra gobièrnu ku no a inkorporá den e partidanan ya menshoná, entre otro, adelanto ku CBCS por fasilitá gobièrnunan di Kòrsou i Sint Maarten pa enfrentá défisitnan temporal den kaha.

Kréditonan kontra bankonan

Bou di e partida akí ta figurá kréditonan di kuenta koriente di CBCS na bankonan komersial.

Sobrá Kréditonan

E partida Sobrá Kréditonan ta abarká, entre otro, e suppartidanan Préstamo- i bononan i Aktivonan material fiho (entre otro edifisionan i inventario). E suppartida Préstamo- i bononan ta abarká bononan negosiabel ku personanan hurídiko di derecho privá establesí na Kòrsou i


Sint Maarten a emití i ku CBCS ta tene den kartera. Bou di nan ta kai, entre otro, bononan ku Sint Maarten Harbour Finance N.V. i Integrated Utility Holding N.V. a emití. E partida Sobrá Kréditonan ta abarká ademas e derechonan di lisensia ku debe CBCS. Bankonan komersial na Kòrsou i Sint Maarten mester paga CBCS derecho di lisensia, basá riba balor di transferensianan di residentenan pa no-residentenan. Siguientemente CBCS ta transferí e derechonan di lisensia pa e respektivo pais ku a kobra e derechonan.

16

SPLIKASHON BREVE DI E PARTIDANAN PASIVO

Na e banda di pasivonan di e balansa ta duna e partidanan den tres kategoria, esta Obligashonnan na no-residentenan, Obligashonnan na residentenan i Kapital i reserva. Na kontinuashon, un splikashon di e partidanan i suppartidanan den kua e kategorianan akí ta ordená.

DiferensiaPasivo 31-mrt-18 28-feb-18

Obligashonnan na no-residentenan 262.2 3.7Depósito di no-residentenan 262.2 3.7

Obligashonnan na residentenan 3,115.2 59.6

Plaka di papel i moneda den sirkulashon 473.6 10.6

Obligashonnan na gobièrnu 232.4 43.7Pais Kòrsou 132.5 -6.4Pais Sint Maarten 97.7 50.1Antiguo Pais Antianan Hulandes 1.8 0.0Agensia- i institutonan di gobièrnu 0.4 0.0

Obligashonnan na bankonan 2,299.6 0.5Kuenta korientenan bankonan 877.3 -8.4Sertifikado di Depósito 109.0 -7.0Reservanan obligatorio 1,313.3 16.0

Obligashonnan na sobrá residentenan 109.6 4.8Depósito di sobrá residentenan 49.4 3.5Sobrá pasivonan 60.2 1.4

Pasivo total 4,313.5 69.2


Obligashonnan na no-residentenan

E kategoria di Obligashonnan na no-residentenan ta konsistí di un partida so, esta Depósito di no-residentenan.

Depósito di no-residentenanE partida akí di balansa ta konsistí di titularnan di kuenta ku no ta residente di Kòrsou ni Sint Maarten, pero ku ta realisá transakshonnan ku òf via Kòrsou i Sint Maarten. Titularnan di kuenta ta, entre otro, Ministerio Hulandes di Asuntunan Interior i Relashonnan di Reino, bankonan sentral ekstranhero i bankonan komersial ekstranhero.

Ministerio Hulandes di Asuntunan Interior i Relashonnan di Reino tin kuenta na CBCS en bista di pago di interes riba i amortisashon di títulonan di debe ku e entidatnan anterior di Antianan Hulandes a emití i ku Estado Hulandes a tuma pa su kuenta den kuadro di saneamentu di debe. Ta usa e kuentanan akí tambe ora Estado Hulandes, den kuadro di e suskripshon koriente, kumpra bono ku gobièrnunan di Kòrsou i Sint Maarten a emití.

Obligashonnan na residentenan

Di dos kategoria, Obligashonnan na residentenan, ta konsistí di e siguiente sinku partidanan: Plaka di papel i moneda den sirkulashon, Obligashonnan na gobièrnu, Obligashonnan na bankonan i Obligashonnan na sobrá residentenan.

18

Plaka di papel i moneda den sirkulashonNa e paisnan Kòrsou i Sint Maarten ta eksklusivamente CBCS por emití plaka di papel i moneda. CBCS ta enkargá ku sirkulashon di plaka na e dos paisnan i, en relashon ku esei, ta yama e banko tambe banko di emishon.

E bankonan komersial ta fungi komo intermediario na emishon di plaka di papel pa públiko. Si na fin di luna públiko lanta hopi plaka di papel na banko —en relashon ku pago di suèldo—, bankonan komersial ta lanta na CBCS plaka di papel a kargo di nan saldo na CBCS.

Den e kaso ei e partida Plaka di papel i moneda den sirkulashon ta oumentá, miéntras ku e suppartida Kuenta Koriente bankonan ta baha. Den kurso di luna públiko ta gasta sèn i e papelnan di plaka ta drenta kahanan di empresanan ku, na nan turno, ta depositá e plakanan riba nan kuentanan bankario. Siguientemente bankonan ta depositá e plakanan di papel na CBCS i konsekuentemente e suppartida Kuenta Koriente bankonan ta bolbe oumentá.

Ademas di e patronchi mensual akí ta presentá tambe oumento di plaka di papel i moneda den sirkulashon den dianan di fiesta i ora ta paga plaka pa fakansi.

Obligashonnan na gobièrnu

E di dos partida, Obligashonnan na gobièrnu, ta abarká e


suppartidanan Pais Kòrsou, Pais Sint Maarten, Antiguo Pais Antianan Hulandes i Agensia- i institutonan di gobièrnu.

Pais KòrsouBou di e suppartida akí ta duna kuenta i rason di e obligashonnan di CBCS pa ku gobièrnu di Kòrsou, o sea e saldonan di gobièrnu di Kòrsou na CBCS. Sin embargo, atministrashon di kaha (aktuashon komo banko di kas) di Pais Kòrsou awor ta konsentrá na un banko komersial.

E partida Pais Kòrsou ta abarká, entre otro, e kuentanan Direkshon di Finansa di Kòrsou, Hòspital Nobo Otrobanda, Areglo fiskal pa Reino (BRK) i Landsontvanger. Via e kuenta di Direkshon di Finansa di Kòrsou ta atendé prinsipalmente transakshonnan di merkado di kapital (depósitonan riba préstamonan emití, pago di interes i amortisashonnan). E kuenta Hòspital Nobo Otrobanda ta usa pa transakshonnan relashoná ku konstrukshon di e hòspital nobo di Kòrsou. E kuenta di BRK ta un kuenta riba kua servisio di impuesto di Hulanda ta depositá e impuesto di dividènt ku e kobra den kuadro di e Areglo fiskal pa Reino (BRK).

20

Pais Sint MaartenE suppartida akí ta konsistí di e kuenta di Direkshon di Finansa di Sint Maarten. Ta usa e kuenta akí, entre otro, pa atendé transakshonnan di merkado di kapital (depósitonan riba préstamonan emití, pago di interes i amortisashonnan). Gobièrnu di Sint Maarten tambe a konsentrá su atministrashon di kaha na un banko komersial.

Antiguo Pais Antianan HulandesE partida akí ta abarká algun kuenta di gobièrnu sentral di e antiguo Pais Antianan Hulandes. Entre otro e kuenta Gouvernement speciaal, ku gobièrnu sentral tabata usa pa paga akreedornan.

Agensia- i institutonan di gobièrnuE suppartida akí ta abarká e kuenta di Banko di Seguro Sosial di Kòrsou.

Obligashonnan na bankonan

E di tres partida, esta Obligashonnan na bankonan, ta abarká tres suppartida, esta Kuenta korientenan bankonan, Sertifikadonan di Depósito i Reservanan Obligatorio.

Kuenta korientenan bankonanVia e suppartida Kuenta korientenan bankonan ta atendé transakshonnan koriente di bankonan komersial. Por ehèmpel kompra i benta di divisa dor di e bankonan na


CBCS. Bankonan ta kumpra divisa na CBCS ora nan no tin sufisiente divisa pa bende ku nan klientenan i nan ta bende CBCS divisa ora nan tin di mas den kaha. Riba e balansa abreviá e partidanan Kuenta korientenan bankonan i Divisa ta oumentá ora bankonan bende divisa ku CBCS i e ta baha den kaso ku bankonan kumpra divisa di CBCS. Otro ehèmpel ta ora bankonan komersial lanta o depositá plaka di papel na CBCS. Bankonan komersial ta lanta plaka di papel i moneda na CBCS pa kumpli ku demanda di públiko i nan ta depositá plaka di papel i moneda na CBCS ora nan tin demasiado den kaha. E suppartida Kuenta korientenan bankonan ta baha, ora bankonan komersial lanta plaka di papel i moneda na CBCS, antó e partida Plaka di papel i moneda den sirkulashon ta oumentá. Den kaso di depósito di plaka di papel i moneda na CBCS lo kontrario ta sosodé. Tambe transakshonnan entre bankonan i gobièrnu i entidatnan (semi)gubernamental ta tuma lugá via e suppartida Kuenta korientenan bankonan. Ora un di e gobièrnunan transferí plaka di su kuenta na CBCS na fabor di su kuenta na un banko komersial, e suppartida Kuenta korientenan bankonan ta oumentá i e partida Pais Kòrsou òf Pais Sint Maarten ta baha. Ora un di e gobièrnunan transferí plaka di su kuenta na un banko komersial na fabor di su kuenta na CBCS, e suppartida Kuenta korientenan bankonan ta baha i e partida Pais Kòrsou òf Pais Sint Maarten ta oumentá.

22

Ademas, bankonan ta hasi transakshon i likidashon di kuenta tambe entre nan. Kontrali na e tres tiponan di transakshon ya menshoná, e transakshonnan entre bankonan no ta trese kambio den e suppartida Kuenta korientenan bankonan.

E tres tiponan di transakshon ya menshoná ta kousa oumento o redukshon di e saldo di bankonan na CBCS —ku sa yama tambe eksedente riba merkado monetario den sentido estrikto. Esei ta e saldo di bankonan na CBCS, despues di deskontá e préstamonan ku nan risibí di CBCS.

E di kuater tipo di transakshon, esta likidashon- i transakshonnan entre bankonan, no tin influensha riba e eksedente riba merkado monetario den sentido estrikto. E siguiente ehèmpel ta aklará un ke otro. Ora doñonan di kuenta di Banko A transferí ANG 5 mion via nan banko pa doñonan di kuenta di Banko B, antó doñonan di kuenta di Banko B na nan turno transferí ANG 2 mion via nan banko pa doñonan di kuenta di Banko A, ta prosesá esei den e asina yamá clearing di e siguiente manera: ta deskontá ANG 3 mion di e saldo di Banko A na CBCS, ku ta e saldo di e transakshonnan en kuestion, i ta oumentá ku ANG 3 mion e saldo di Banko B na CBCS. Konsekuentemente e saldo total di e bankonan —e eksedente riba merkado monetario den sentido estrikto— no ta kambia.

E suma di plaka di papel i moneda den sirkulashon i e saldonan di kuenta koriente di bankonan komersial na


CBCS nan ta yama e base monetario o sea e “monetary base.” Kambio di e base monetario ta un indikashon di likides ku —via e diferente transakshonnan via CBCS— ta drenta ekonomia òf ku ta saka di ekonomia.

Sertifikado di DepósitoUn di e instrumentonan monetario di maneho di CBCS ta benta públiko na findishi di Sertifikado di Depósito (CD). CD ta título di debe negosiabel di CBCS, ku ta emití na múltiplo di ANG 100.000. Mediante benta públiko na findishi di CD, CBCS ta apsorbé parti di e surplus na fondonan libremente disponibel na bankonan, komo konsekuensia di lokual ta limitá posibel destinashon di e fondonan pa dunamentu di krédito. Kada kinsena ta tene e findishinan. E periodo di balides di CD por ta 1 luna, 3 luna, 6 luna i 12 luna. E interes ku ta paga riba e CDnan ta mará na e LIBID-rate. Mediante inskripshon na e findishinan di CD, bankonan komersial por invertí ku ganashi nan surplusnan na likides.

Reservanan obligatorioFor di 1 di yanüari 1999 e reserva obligatorio ta prinsipal intrumento di e maneho monetario. E areglo di reserva obligatorio (reserve requirement) ta enserá ku bankonan mester tene un porsentahe determiná di nan obligashonnan lokal riba un kuenta blokeá na CBCS. Mensualmente CBCS ta fiha e porsentahe a base di indikadornan ekonómiko i monetario, entre nan, kobertura di importashon, kresementu ekonómiko i kresementu di dunamentu di krédito lokal. E

24

reserva obligatorio ta un intrumento di e maneho monetario, ku ta apsorbé e surplus na fondonan libremente disponibel na bankonan. Bankonan tin e fondonan akí disponibel pa atendé trasakshonnan diario i komo prekoushon pa nesesidatnan inesperá di likides. Si e fondonan libremente disponibel ta suma mas di loke ta nesesario pa atendé trasakshonnan diario i e motibu di prekoushon, e surplus ta un fuente potensial pa dunamentu di préstamo. Apsorbiendo e fondonan líkido tin influensha riba kapital di bankonan pa por duna krédito. Di e forma ei por dirigí i influenshá konsumo i finalmente e reservanan di divisa, ya ku konsumo ta resultá den importashon. P’esei, den kuadro di su maneho monetario, CBCS ta purba prevení un kresementu muchu fuerte di krédito.

Kontrali na e CDnan, no ta paga interes riba e reservanan obligatorio. E kombinashon di reservanan obligatorio i CDnan ta e montante ku mensualmente CBCS ta apsorbé di bankonan riba merkado monetario.

Obligashonnan na sobrá residentenan

E di kuater partida, Obligashonnan na sobrá residentenan, ta konsistí di dos suppartida, esta Depósito di sobrá residentenan i Sobrá pasivonan.

Depósito di sobrá residentenanE suppartida akí ta abarká depósito di sobrá residentenan ku


no ta gobièrnu, manera Fondo General di Penshon di Kòrsou (APC) i USONA. E entidatnan akí ta realisá, entre otro, un parti di nan transakshonnan ku eksterior via nan kuentanan na CBCS. Den kaso di e kuenta di USONA, e transakshonnan ta konserní prinsipalmente likidashon di pagonan pa konstrukshon di e hòspital nobo di Kòrsou. Prueba es ku USONA ta e organisashon ku ta guia konstrukshon di e hòspital nobo bou di enkargo di gobièrnu di Kòrsou.

Sobrá pasivonan E suppartida Sobrá pasivonan ta abarká, entre otro, e kuenta Fondonan den konsignashon. E kuenta akí ta konsistí di, entre otro, fondonan di kua no ta konosí ken ta e doñonan legítimo i ku a duna CBCS den kustodia te dia solushoná un ke otro. E kompensashon di lisensia ku bankonan a kobra i ku nan mester paga ainda komo konsekuensia di e likidashon definitivo entre CBCS i e paisnan Kòrsou i Sint Maarten ta kai bou di e suppartida Sobrá pasivonan.

Kapital i reserva

Meskos ku otro entidatnan finansiero, CBCS tin kapital i reserva ku kua e por apsorbé pérdidanan insidental. Konforme artíkulo 34 di Statüt di Banko e kapital di CBCS ta ANG 30 mion. Ademas CBCS ta disponé di un fondo di reserva di ANG 30 mion. E reserva akí ta destiná pa kubri posibel pérdidanan di kapital di CBCS. Konforme artíkulo 35 di Statüt di Banko, CBCS ta outorisá ademas pa —despues

26

di aprobashon di e reunion di e benefisiarionan efektivo (Vermogensgerechtigden) i despues di a skucha Konseho di Komisario— forma reserva destiná pa sierto metanan òf kambia e destinonan.

Ta forma e reservanan destiná pa sierto metanan pa por karga ku rebalorashonnan ku ta konserní kambionan di balor riba merkado i tiponan di kambio di divisanan, ku ta dividí den reserva di oro, saldonan ekstranhero di banko i invershonnan ekstranhero. Oumento di balor ta na fabor i redukshon di balor ta pa kuenta di e reservanan destiná pa sierto metanan. Si den un aña e saldo di e reservanan destiná pa sierto metanan bira negativo, e saldo negativo ta pa kuenta di e ganashi.

E kategoria Kapital i reserva ta konsistí ademas di e partida Ganashinan no repartí, ku ta konserní e resultadonan neto di e aña koriente i esunnan anterior i ku ainda no a repartí entre e paisnan Kòrsou i Sint Maarten.


FINAL

Manera a splika mas ariba, e balansa abreviá ta duna núkleo di nos sistema finansiero. Partidanan ku ta hunga un papel importante den esei ta: posishon di likides na bankonan, plaka di papel i monedanan den sirkulashon, posishon di likides di gobièrnu i reserva di divisa. Por sigui desaroyo di e partidanan akí minusiosamente den e publikashonnan mensual di e balansa abreviá. Asina Centrale Bank van Curaçao en Sint Maarten ta oumentá komprenshon di un grupo mas grandi di komunidat di desaroyonan monetario i finansa públiko.

Date post:	01-May-2019
Category:	Documents
Upload:	tranliem
View:	223 times
Download:	0 times

BALANSA ABREVIÁ - centralbank.cw balans... · Kréditonan kontra no-residentenan ... Kréditonan...

Documents